కరీనా కపూర్‌ కోప్పడ్డారు. భర్త సైఫ్‌ అలీఖాన్‌పై కస్సుబుస్సులాడారు. అసలు మేటర్‌ ఏంటంటే... గతేడాది డిసెంబర్‌లో సైఫీనా దంపతులకు ఓ అబ్బాయి పుట్టిన సంగతి తెలిసిందే. బుడ్డోడి ఫొటోను సైఫ్‌ అలీఖాన్‌ వాట్సాప్‌ ప్రొఫైల్‌ పిక్‌గా పెట్టుకోవడంతో అతడి ఫ్రెండ్స్‌ అందరూ చూశారు. అంతేనా? ఫోటోను సోషల్‌ మీడియాలో షేర్‌ చేయడంతో ప్రేక్షకులూ చూశారు.
 
 బుజ్జిగాడి ఫొటోను చూసినవాళ్లంతా ముద్దు ముద్దుగా ఉన్నాడంటూ మెచ్చుకున్నారు. ప్రశంసలకు తోడు ‘తైమూర్‌’ పేరు తెచ్చిన తంటా ఉండనే ఉంది. దాంతో కరీనా హ్యాపీగా లేరట. ‘‘నా బుడ్డోడికి దిష్టి తగిలింది’’ అని సైఫ్‌పై కోప్పడ్డారట! స్వయంగా సైఫ్‌ అలీఖానే ఈ సంగతిని వెల్లడించారు. ‘నేను అలాంటివి నమ్మను. దిష్టి తగిలుంటే ఈపాటికి కరీనా హాస్పటల్‌లో ఉండేది కదా! మా అబ్బాయి ఫొటోను సీక్రెట్‌గా ఉంచాలనుకో లేదు. అలాగని అందరికీ చూపించా లనుకోలేదు’’ అన్నారు సైఫ్‌.


 
 నెటిజన్లపై మండిపడ్డ సీనియర్‌ నటుడు
 
 సైఫ్‌ అలీఖాన్‌, కరీనా కపూర్‌ దంపతులను నెటిజన్లు కొందరు తీవ్రంగా కించపరుస్తున్నారు. ఇటీవల తమకు పుట్టిన మొదటి శిశువుకు తైమూర్‌ అలీ ఖాన్‌ పటౌడీ అని పేరు పెట్టినట్టు సైఫ్‌, కరీనా జంట ప్రకటించడంతో.. ఆ పేరు ఎందుకు పెట్టారంటూ వింత తర్కంతో ప్రశ్నిస్తున్నారు. చరిత్ర ప్రకారం చూసుకుంటే 14వ శతాబ్దానికి చెందిన మంగోలియన్‌ దురాక్రమణదారుడు తైమూర్‌ భారత్‌పై దండేత్తి ఢిల్లీని కొల్లగొట్టాడు. ఈ దాడిలో వేలాదిమంది చనిపోయారు. అయితే, తైమూర్‌ అనే పేరుకు 'సాహసోపేతమైన రాజు', ఇనుములా దృఢమైన వాడు అనే అర్థాలు ఉన్నాయి.
 
 తైమూర్‌ పేరుపై అభ్యంతరాలు వ్యక్తం చేస్తూ నెటిజన్లు చేస్తున్న కామెంట్లపై అలనాటి నటుడు రిషి కపూర్‌ ఆగ్రహం వ్యక్తం చేశారు. విద్వేషపూరితంగా కామెంట్లు చేస్తున్నవారిని తీవ్రంగా తప్పుబట్టారు. 'తల్లిదండ్రులు తమకు నచ్చిన పేరును తమ పిల్లలకు పెట్టుకుంటారు. అభ్యంతరం చెప్పడానికి మీరు ఎవరు? మీ పనేదో మీరు చూసుకోండి. ప్రపంచవ్యాప్తంగా చాలామందికి అలెగ్జాండర్‌, సికందర్‌ వంటి పేర్లు కూడా ఉంటాయి. చరిత్రలో వారేమీ సాధువులు కారు. అంతమాత్రాన తప్పుబడతామా? తల్లిదండ్రులు తమకు నచ్చిన పేరు పిల్లలకు పెట్టుకుంటే మీకు ఏం నొప్పి' అంటూ విద్వేషపూరితంగా కామెంట్లు చేసిన పలువురు నెటిజన్లను ఆయన దుయ్యబట్టారు.
 
 Alexander and Sikandar were no saints. They are common names in the world. Apna kaam karo na tum. Tumko kya takleef hai? https://t.co/lT2i5U1Qod
 — Rishi Kapoor (@chintskap) 21 December 2016