ఫస్ట్‌ పెన్, ఫస్ట్‌ టూర్, ఫస్ట్‌ ఫ్రెండ్, ఫస్ట్‌ లవ్, ఫస్ట్‌ జాబ్‌.. ఇలా ఫస్ట్‌ని జస్ట్‌ అలా మరచిపోలేం. జీవితాంతం గుర్తుండే అనుభూతులు అవి. వీటిలో పొరపాటున దేన్నైనా మరచిపోయినా ఫస్ట్‌ లవ్‌ని మాత్రం అంత సులువుగా మరచిపోలేం. వచ్చే వేలంటైన్స్‌ డేకి ఐదు రోజుల ముందు వరుణ్‌ తేజ్‌ ఫస్ట్‌ లవ్‌ని చూడబోతున్నాం. ‘ఫిదా’ వంటి మంచి లవ్‌స్టోరీ తర్వాత వరుణ్‌ చేస్తోన్న మరో లవ్‌స్టోరీ ‘తొలి ప్రేమ’. వరుణ్‌ తేజ్, రాశీఖన్నా జంటగా వెంకీ అట్లూరి దర్శకత్వంలో శ్రీ వెంకటేశ్వర సినీ చిత్ర ఎల్‌ఎల్‌పి పతాకంపై బీవీఎస్‌ఎన్‌ ప్రసాద్‌ నిర్మిస్తున్నారు. ఈ చిత్రం టైటిల్‌ పోస్టర్‌ను సోమవారం చిత్రబృందం అధికారికంగా రిలీజ్‌ చేసింది. ‘‘హార్ట్‌ టచింగ్‌ అండ్‌ బ్యూటిఫుల్‌ లవ్‌ ఎంటర్‌టైనింగ్‌ మూవీ ఇది. వరుణ్‌ తేజ్‌ను కొత్త క్యారక్టరైజేషన్‌లో చూస్తారు. డిసెంబర్‌లో షూటింగ్‌ను కంప్లీట్‌ చేసి ఫిబ్రవరి 9న సినిమాను విడుదల చేయాలనుకుంటున్నాం’’ అన్నారు బీవీఎస్‌ఎన్‌ ప్రసాద్‌.ఈ చిత్రానికి సంగీతం: తమన్‌.

గతంలో హిట్‌ అయిన పాటలను రీమేక్‌ చేయడం చూశాం. అది ఇప్పుడు కాస్తా సినిమా పేర్లపై పడింది. గతంలో బ్లాక్‌బస్టర్ల పేర్లను మళ్లీ తెరపై వాడేస్తున్నారు. అదే కోవలో వరుణ్‌ తేజ్‌ చేరాడు. ఫిదాతో బ్లాక్‌ బస్టర్‌ కొట్టిన వరుణ్‌ తన తర్వాత చిత్రానికి చాలా విరామం తీసుకున్నాడు. ఆ గ్యాప్‌ను పూరించడానికి బాబాయ్‌ పవన్‌ కల్యాణ్‌ బ్లాక్‌బస్టర్‌ సినిమా తొలిప్రేమ టైటిల్‌ను తన తాజా సినిమాకు పెట్టుకున్నాడు. తొలిప్రేమ పవన్‌కల్యాణ్‌ కేరీర్‌ను మలుపు తిప్పిన చిత్రం. కరుణాకరన్‌ దర్శకత్వంలో పవన్‌ కల్యాణ్‌, కీర్తిరెడ్డి నటించిన ఈ చిత్రం యువతను విపరీతంగా ఆకట్టుకుంది. అప్పట్లో ఓ ట్రెండ్‌ సృష్టించింది. ఫిదాతో హిట్‌ కొట్టిన వరుణ్‌, మరో బ్లాక్‌బస్టర్‌ కొట్టాలనే ఉద్దేశంతో ఉన్నాడు. దీంతో  బాబాయ్‌ టైటిల్‌ను తన తాజా చిత్రానికి టైటిల్‌గా పెట్టుకున్నాడు. ఈమేరకు సినిమా టైటిల్‌ పోస్టర్‌ను వరుణ్‌ తేజ్‌ సోషల్‌ మీడియా ఫేస్‌బుక్‌లో పోస్టు చేశాడు. శ్రీ వెంకటేశ్వర సినీ చిత్ర బ్యానర్‌లో తెరకెక్కుతున్న చిత్రాన్ని ప్రముఖ నిర్మాత బీవీఎస్‌ఎన్‌ ప్రసాద్‌ నిర్మించనున్నారు. తమన్‌ సంగీతాన్ని అందించనున్నారు.

వరుణ్‌తేజ్‌ తెలుగు సినిమాల సంగతికొస్తే... ప్రస్తుతం వెంకీ అట్లూరి దర్శకత్వంలో బీవీఎస్‌ఎన్‌ ప్రసాద్‌ నిర్మిస్తున్న సినిమాలో హీరోగా నటిస్తున్నారు. రాశీ ఖన్నా హీరోయిన్‌గా నటిస్తున్న ఈ చిత్రానికి ‘తొలిప్రేమ’ టైటిల్‌ ఖరారు చేసినట్టు సమాచారమ్‌. ప్రస్తుతం ఈ సిన్మా పనులతో బిజీగా ఉన్న వరుణ్, నిన్న(ఆదివారం) ఫ్యామిలీతో సరదాగా గడిపారు. ‘సండే లంచ్‌ విత్‌ ఫ్యామిలీ’ అని ఇన్‌స్టాగ్రామ్‌లో పేర్కొన్నారు.

... ఓసారి టేస్ట్‌ చేస్తారా? అని హీరో వరుణ్‌తేజ్‌ ప్రేమగా అడిగినట్లు ఉంది ఇన్‌సెట్‌లో ఉన్న ఫొటో చూస్తుంటే. జస్ట్‌ కాస్త టైమ్‌ దొరికితే చాలు గరిటె పట్టుకుని తమలో ఉన్న వంట టాలెంట్‌ను చూపించడానికి రెడీ అయిపోతున్నారు టాలీవుడ్‌ యంగ్‌ హీరోలు. నాగచైతన్య అప్పడప్పుడూ వెరైటీస్‌ వండే విషయాన్ని సమంత ఫొటోలు తీసి మరీ, బయటపెడుతుంటారు. నారా రోహిత్‌ అయితే తన ప్రతి సినిమా షూటింగ్‌లో ఏదో ఒక రోజున స్వయంగా బిర్యానీ, చేపల పులుసు వంటివి చేస్తుంటారు. ఇప్పుడు వరుణ్‌ తేజ్‌ కూడా గరిటె తిప్పడం తనకూ వచ్చంటున్నారు. ‘‘సరదాగా ట్రై చేశా’’ అంటూ తాను కుక్‌ చేసిన ఐటమ్స్‌ని ప్లేట్‌లో పెట్టి, చిరునవ్వులు చిందిస్తూ ఫొటో దిగారు.  వెంకీ అట్లూరి దర్శకత్వంలో వరుణ్‌తేజ్, రాశీఖన్నా జంటగా ఓ సినిమా రూపొందుతున్న సంగతి తెలిసిందే. ఈ చిత్రానికి ‘తొలిప్రేమ’ అనే టైటిల్‌ను అనుకుంటున్నారని ఫిల్మ్‌నగర్‌ సమాచారం. బహుశా షూటింగ్‌కి కాస్త టైమ్‌ దొరికినప్పుడు వంటగదితో వరుణ్‌ ట్రై చేశారేమో. ఈ చిత్రాన్ని వచ్చే ఏడాది ఫిబ్రవరి 9న విడుదల చేయాలనుకుంటున్నారు. ఈ సంగతి ఇలా ఉంచితే.. నానీతో ‘నిన్ను కోరి’లాంటి ఫీల్‌గుడ్‌ లవ్‌స్టోరీ తీసిన శివ నిర్వాణ దర్శకత్వంలో వరుణ్‌ తేజ్‌ నెక్ట్స్‌ సినిమా చేయబోతున్నారని ఫిల్మ్‌నగర్‌ టాక్‌.

ఫిబ్రవరి... ప్రేమికులకు వెరీ స్పెషల్‌ మంత్‌! ఎందుకో స్పెషల్‌గా చెప్పాలా? ఫిబ్రవరి 14న వేలంటైన్స్‌ డే! 14కి ముందు వారం రోజులు... ఒక్కో రోజునూ ఒక్కో పేరుతో సెలబ్రేట్‌ చేస్తారు. దటీజ్‌ వేలంటైన్స్‌ వీక్‌. సో, ప్రేమికులకు వెరీ వెరీ స్పెషల్‌ వీక్‌. అప్పుడే వరుణ్‌ తేజ్‌ ‘తొలిప్రేమ’ను ప్రేక్షకులందరికీ చూపిస్తారట! వరుణ్‌ తేజ్, రాశీ ఖన్నా జంటగా వెంకీ అట్లూరి దర్శకత్వంలో శ్రీ వెంకటేశ్వర సినీచిత్ర సంస్థపై బీవీఎస్‌ఎన్‌ ప్రసాద్‌ ఓ చిత్రం నిర్మిస్తున్న సంగతి తెలిసిందే. దీనికి ‘తొలిప్రేమ’ టైటిల్‌ ఖరారు చేశారట. వచ్చే ఏడాది వేలంటైన్స్‌ వీక్‌లో చాక్లెట్‌ డే (ఫిబ్రవరి 9)న చిత్రాన్ని విడుదల చేయడానికి సన్నాహాలు చేస్తున్నట్టు నిర్మాత బీవీఎస్‌ఎన్‌ ప్రసాద్‌ తెలిపారు. ఇంకా ఆయన మాట్లాడుతూ– ‘‘ఇటీవల 40 రోజులు ఏకధాటిగా లండన్‌లో చేసిన షెడ్యూల్‌తో 70 శాతం సినిమా పూర్తయింది. డిసెంబర్‌కి చిత్రీకరణ పూర్తి చేసి, వచ్చే ఏడాది ఫిబ్రవరి 9న చిత్రాన్ని విడుదల చేయాలనుకుంటున్నాం. తమన్‌ సంగీతం,  జార్జ్‌ సి. విలియమన్స్‌ ఛాయాగ్రహణం చిత్రానికి పెద్ద ఎసెట్‌గా నిలుస్తాయి’’ అన్నారు.

‘‘ఐయామ్‌ ఏ డే డ్రీమర్‌ అండ్‌ నైట్‌ థింకర్‌’’ అని సినిమాలో తన క్యారెక్టరైజేషన్‌ గురించి హింట్‌ ఇచ్చారు హీరో వరుణ్‌తేజ్‌. అయితే ఆయన కల కన్నది ఎవరికోసమో? నిద్రపోకుండా అంతలా ఎవరి గురించి థింక్‌ చేశారన్న సస్పెన్స్‌ ఎలిమెంట్స్‌ను మాత్రం స్రీన్‌పైనే చూడాలంటున్నారు. వెంకీ అట్లూరి దర్శకత్వంలో  వరణ్‌తేజ్‌ హీరోగా రూపొందుతోన్న చిత్రం ‘తొలిప్రేమ’. రాశీఖన్నా కథానాయిక. బీవీఎస్‌ఎన్‌ ప్రసాద్‌ నిర్మిస్తున్నారు. గత నెల్లో స్టార్ట్‌ చేసిన లండన్‌ షెడ్యూల్‌ను కంప్లీట్‌ చేశారు. అక్కడ సినిమాలోని కీలక సన్నివేశాలను షూట్‌ చేశారు. లండన్‌లో మైనస్‌ 12 డిగ్రీల చలిలో కూడా టీమ్‌ షూటింగ్‌ చేశారు. ‘‘లండన్‌లో లాంగ్‌ షెడ్యూల్‌ కంప్లీట్‌ చేశాం. అవుట్‌పుట్‌ బాగా వచ్చింది. షూట్‌ను బాగా ఎంజాయ్‌ చేశాం’’ అన్నారు వరుణ్‌ తేజ్‌. ‘‘బ్యూటీఫుల్‌ లవ్‌స్టోరీ. ఒక యాక్టర్‌గా, పర్సనల్‌గా నన్ను ఇన్‌స్పైర్‌ చేసిన క్యారెక్టర్‌ను ఈ సినిమాలో చేస్తున్నా. అమేజింగ్‌ షూట్‌ టైమ్‌’’ అన్నారు రాశీఖన్నా. అన్నట్లు... ఈ సినిమాలో వరుణ్‌తేజ్‌ సిక్స్‌ప్యాక్‌తో కనిపించబోతున్నారన్నది ఫిల్మ్‌నగర్‌ టాక్‌.

చూశారా? శీతాకాలం గాలులకు నా హెయిర్‌ క్లియర్‌గా కంట్రోల్‌ తప్పింది. కానీ, వరుణ్‌తేజ్‌ హాయిగా నవ్వుతూ ఫోన్‌ చూసుకుంటున్నాడు. (ఫోనులో) ఎవరో? ఏంటో?... ఆశ్చర్యంతో కూడిన ఆనందంతో అభిమానులందర్నీ అడిగారు రాశీ ఖన్నా. వరుణ్‌తేజ్, రాశీ ఖన్నా జంటగా నటిస్తున్న సినిమా ‘తొలిప్రేమ’. వెంకీ అట్లూరి దర్శకత్వంలో బీవీఎస్‌ఎన్‌ ప్రసాద్‌ నిర్మిస్తున్న ఈ సినిమా చిత్రీకరణ ప్రస్తుతం లండన్‌లో జరుగుతోంది. అక్కడ రాశీ తీసుకున్న సెల్ఫీనే మీరు చూస్తున్నది. అన్నట్టు... ఓ విషయం గమనించారా? వరుణ్‌తేజ్‌ హెయిర్‌ స్టైల్‌ కొంచెం కొత్తగా ఉంది. ‘తొలిప్రేమ’లో లుక్‌ ఇదేనని కొత్తగా చెప్పక్కర్లేదు కదూ!!


 చేసేది ప్రేమకథ అయినంత మాత్రాన హీరోలు సాఫ్ట్‌గా కనిపించాల్సిన అవసరం లేదు. ఇవాళ అన్ని సినిమాలకు హీరోలు భారీ ఫిజిక్‌ మెయిన్‌టైన్‌ చేస్తున్నారు. ప్రజెంట్‌ హీరో వరుణ్‌ తేజ్‌ కూడా కండలు పెంచుతూ, తన ఫిట్‌నెస్‌పై ఫోకస్‌ పెట్టారు. జిమ్‌లో వర్కౌట్స్‌ చేస్తున్న ఫొటోతో... ‘‘నేనొక గోల్‌ పెట్టుకుని వర్కౌట్స్‌ చేస్తున్నాను. సగం దూరం వచ్చేశాను’’ అని వరుణ్‌ ట్వీట్‌ చేశారు. సిక్స్‌ప్యాక్‌ కోసం ప్రయత్నిస్తున్నట్టు సమాచారం. వరుణ్‌తేజ్‌ హీరోగా వెంకీ అట్లూరి దర్శకత్వంలో బీవీయస్‌యన్‌ ప్రసాద్‌ ‘తొలిప్రేమ’ పేరుతో ఓ చిత్రం నిర్మిస్తోన్న సంగతి తెలిసిందే. టైటిల్‌ సాఫ్ట్‌గా ఉన్నా ఇందులో వరుణ్‌ రఫ్‌ లుక్‌లో, సిక్స్‌ప్యాక్‌తో కనిపిస్తారేమో. అందుకే జిమ్‌లో కసరత్తులు చేస్తున్నారేమో!


 పవన్‌కల్యాణ్‌ ‘తొలిప్రేమ’లో క్లైమాక్స్‌ సీన్‌ గుర్తుందా? హార్వర్డ్‌ యూనివర్శిటీకి వెళ్లడానికి ఫ్లైట్‌ ఎక్కే ముందు హీరోకి ‘ఐ లవ్యూ’ చెప్తుంది హీరోయిన్‌. అప్పటివరకూ కథంతా ఇండియాలోనే జరుగుతుంది. సిన్మా కూడా! ఇప్పుడు బాబాయ్‌ టైటిల్‌తో అబ్బాయ్‌ చేస్తున్న కథ మాత్రం సరిహద్దులు దాటింది. వరుణ్‌తేజ్, రాశీఖన్నా జంటగా వెంకీ అట్లూరి దర్శకత్వంలో రూపొందుతున్న సినిమా ‘తొలిప్రేమ’.
 
 ఇందులో సెకండాఫ్‌లో కీలక సన్నివేశాలన్నీ లండన్‌లో జరుగుతాయట. వాటి చిత్రీకరణ కోసం లండన్‌ వెళ్లడానికి టీమంతా ఫ్లైట్‌ టికెట్స్‌ బుక్‌ చేసుకున్నారు. సుమారు 30 రోజులు ఈ షెడ్యూల్‌ జరుగుతుంది. ప్రధాన తారాగణంపై కీలక సన్నివేశాలు, వరుణ్, రాశీలపై రెండు పాటలు చిత్రీకరించడానికి ప్లాన్‌ చేశారట. శ్రీ వెంకటేశ్వర సినీచిత్ర పతాకంపై బీవీఎస్‌ఎన్‌ ప్రసాద్‌ ఈ చిత్రాన్ని నిర్మిస్తున్నారు. ఎస్‌.ఎస్‌. తమన్‌ ఈ చిత్రానికి స్వరకర్త.