దళారులను ప్రోత్సహిస్తున్నారు..
 పాడేరు, అరకు ఎమ్మెల్యేల ధ్వజం
  
 పాడేరు: గిరిజన సహకార సంస్థ (జీసీసీ) దళారులను ప్రోత్సహించేలా వ్యవహరిస్తోందని పాడేరు, అరకు ఎమ్మెల్యేలు గిడ్డి ఈశ్వరి, కిడారి సర్వేశ్వరరావులు దుయ్యబట్టారు. జిల్లా కలెక్టర్ ఎన్.యువరాజ్ అధ్యక్షతన మంగళవారం జరిగిన ఐటీడీఏ పాలకవర్గ సమావేశంలో ఇద్దరూ  జీసీసీ తీరుపై ద్వజమెత్తారు. చింతపండు కొనుగోలు ధర పెంచలేదని, పలు అటవీ, వ్యవసాయ ఉత్పత్తుల కొనుగోలు ఆపేశారని, గిరిజనులకు గిట్టుబాటు ధర కల్పించడంలో, అటవీ ఉత్పత్తుల కొనుగోలులో జీసీసీ తీవ్ర అలక్ష్యం వహిస్తోందన్నారు. డీఆర్‌డిపోల నిర్వహణకు డీలర్లను నియమించడం సరికాదన్నారు. ప్రభుత్వం నిధులిస్తున్నా కాఫీ కొనుగోలులో  సంస్థ నిర్లక్ష్యంగా వ్యవహరిస్తోందన్నారు. జీకేవీధి మండలంలో రైతుల వద్ద పెద్ద ఎత్తున కాఫీ నిల్వలు ఉండిపోయాయని, తక్షణం కొనుగోలు చేయాలని డిమాండ్ చేశారు. జీసీసీ ఇటీవల విశాఖలో నిర్వహించిన గిరిజన ఉత్సవాలకు ఎమ్మెల్యేలను , గిరిజన ప్రతినిధులను ఆహ్వానించకపోవడంలో ఆంతర్యమేమిటని నిలదీశారు.
  
 3 గంటల్లో ముగిసిన సమావేశం
 సమావేశం నామమాత్రంగా సాగింది.  26 అజెండా అంశాలపై పూర్తిస్థాయిలో చర్చ జరగలేదు. పాడేరు, అరకు ఎమ్మెల్యేలు, ఐటీడీఏ పీవో, సబ్ కలెక్టర్, జెడ్పీ వైస్‌చైర్మన్ హాజరయ్యారు. గిరిజన సంక్షేమశాఖ మంత్రి కిశోర్‌బాబు రాలేదు. 3 గంటల్లో సమావేశం ముగిసింది. వివిధ అభివృద్ధి పథకాల అమలుపై సమీక్షకే సమావేశం పరిమితమైంది. వైద్య ఆరోగ్యశాఖ, ఆర్‌డబ్ల్యూఎస్, జీసీసీ, అటవీశాఖ, పశు సంవర్థకశాఖ, ఎస్‌ఎంఐ శాఖల పథకాలపై సమీక్ష జరిగింది. ఏజెన్సీలో రిజర్వు ఫారెస్ట్‌లో రోడ్ల నిర్మాణానికిఅటవీశాఖ అధికారులు ఆటంకం కలిగించకుండా సత్వర చర్యలు తీసుకోవాలని ఎమ్మెల్యేలు కోరారు. కొన్ని చోట్ల ఫారెస్ట్ బీట్ ఆఫీసర్లు, రేంజర్లు నాన్ ఫారెస్ట్ ఏరియాల్లో కూడా రోడ్ల నిర్మాణానికి ఆటంకం కలిగిస్తున్నారని, దీని వల్ల పనులు ఆగిపోతున్నాయని పీవో కలెక్టర్ దృష్టికి తెచ్చారు. దీనిపై విశాఖపట్నం, పాడేరు డీఎఫ్‌వోలు స్పందించి ఇలాంటి  వాటిని తమ దృష్టికి తీసుకొస్తే చర్యలు తీసుకుంటామన్నారు. 
  
 
 విద్యార్థుల మరణాలను నియంత్రించండి
 ఏజెన్సీఆశ్రమ పాఠశాలల్లో విద్యార్థుల మరణాలను నియంత్రణకు నిర్ధుష్టమైన చర్యలు తీసుకోవాలని ఎమ్మెల్యే గిడ్డి ఈశ్వరి, కలెక్టర్, పీవోలను కోరారు. రెండు నెలల్లో పది మంది విద్యార్థులు చనిపోవడం తీవ్ర ఆవేదన కలిగిస్తోందన్నారు. పాఠశాలల్లో  తరచూ వైద్యశిబిరాలు నిర్వహించాలన్నారు. ఆశ్రమాల్లో హెల్త్ వర్కర్లను నియమించాలని సూచించారు. అరకు ఎమ్మెల్యే కిడారి సర్వేశ్వరరావు మాట్లాడుతూ విద్యార్థుల మరణాలపై వార్డెన్ల మీద చర్యలు తీసుకోవడం వల్ల పరిస్థితులు మెరుగు పడవని, మరణాలకు గల కారణాలను గుర్తించాలన్నారు. జిల్లా కలెక్టర్ మాట్లాడుతూ విద్యార్థులకు అందిస్తున్న వైద్యసేవలపై కొనసాగింపు ఉండటం లేదని, పాఠశాలల వారీగా ఓరియంటేషన్ కార్యక్రమం నిర్వహించాలని సూచించారు. పీవో హరినారాయణన్ మాట్లాడుతూ ఇటీవల జరిగిన విద్యార్థుల మరణాలపై జిల్లా కలెక్టర్ ఆదేశాల మేరకు కేజీహెచ్ బృందంతో అధ్యయనం చేస్తున్నామని, మరణించిన విద్యార్థుల కుటుంబాలకు సీఎం రిలీఫ్ ఫండ్ కింద ఆర్థిక సాయం అందించేందుకు ప్రతిపాదించామని తెలిపారు. సమావేశంలో సబ్ కలెక్టర్ ఎల్.శివశంకర్, డివిజన్‌స్థాయి అధికారులు పాల్గొన్నారు.
  
 
 ప్రజాప్రతినిధుల పట్ల అలక్ష్యం వద్దు: కలెక్టర్
 సంక్షేమ, అభివృద్ధి పథకాల అమలులో ప్రజా ప్రతినిధులను విధిగా భాగస్వాములను చేయాలని కలెక్టర్ ఎన్.యువరాజ్ అధికారులకు సూచించారు. ప్రజా ప్రతినిధుల పట్ల అలక్ష్యం వహించినట్టు ఫిర్యాదులు వస్తే చర్యలు తీసుకుంటామని హెచ్చరించారు. తాగునీటి పథకాల నిర్వహణపై అవగాహనకు మండలాలవారీ సర్పంచ్‌లకు వర్క్‌షాపులు నిర్వహించాలని సూచించారు. ఏజెన్సీలో రహదారులు లేని పరిస్థితి, సీజనల్‌గా వచ్చే వ్యాధులు, తాగునీటి కొరత వల్ల  ఏర్పడుతున్న సమస్యలను అధిగమించేందుకు సమన్వయంతో పని చేయాలన్నారు. ఏజెన్సీలో ఐఏపీ పథకం నిలిచిపోయిందని, దానికి బదులుగా ఎస్‌డీపీ పథకం అమలు చేస్తున్నారన్నారు. ఏజెన్సీలో రోడ్ల నిర్మాణానికి రూ.30 కోట్లు కేటాయించినట్టు చెప్పారు. తాగునీటి ఎద్దడిని అధిగమించేందుకు పంచాయతీ నిధులతో పనులు చేపట్టేందుకు ఎంపీడీవోలు చొరవచూపాలన్నారు. ఇందుకు ఉత్తర్వులు ఇవ్వాలని జిల్లా పంచాయతీ అధికారిని ఆదేశించారు. ఉపాధి పనులు పూర్తవుతున్నందున కోళ్లు, గొర్రెలు, మేకలు వంటి యూనిట్లను సబ్సిడీపై మంజూరు చేయాలన్నారు. ఇకపై గిరిజన రైతులకు సబ్సిడీపై విత్తనాలు సరఫరా చేస్తామన్నారు.  ఐటీడీఏ పీవో హరినారాయణన్ మాట్లాడుతూ ఆశ్రమ విద్యార్థులకు బీమా సౌకర్యం కల్పించేందుకు ప్రతిపాదిస్తున్నామని తెలిపారు.
  
 
 పర్సంటేజీలతో నాణ్యత లేని పనులు
 ఏజెన్సీలో రూ. కోట్లతో చేపడుతున్న ఇంజినీరింగ్ పనుల్లో పర్సంటేజీల జోరు వల్ల అభివృద్ధిపనుల్లో నాణ్యత లోపిస్తోందని అరకు ఎమ్మెల్యే కిడారి సర్వేశ్వరరావు విమర్శించారు. స్థాయిమేరకు అధికారులు పర్సంటేజీలు పంచుకోవడం, కాంట్రాక్టర్లకు 20 శాతం పోగా.. అంచనా వ్యయంలో సగం నిధులతోనే పనులు జరుగుతున్నాయన్నారు. ఇలాగైతే అభివృద్ధి ఎలా సాధ్యమని ప్రశ్నించారు. క్షేత్రస్థాయిలో స్థానిక ప్రజా ప్రతినిధులకు అధికారులు విలువ ఇవ్వడం లేదన్నారు. ప్రజా ప్రతినిధులకు తెలియకుండా పనులు చేపట్టడంతో పారదర్శకత లోపిస్తున్నదన్నారు.
  
 నీటి పథకాల బాధ్యత పంచాయతీలదే
 ఏజెన్సీలో ఆర్‌డబ్ల్యూఎస్ ద్వారా గ్రామాలలో నిర్మిస్తున్నతాగునీటి పథకాల నిర్వహణ బాధ్యత పంచాయతీలదేనని జిల్లా కలెక్టర్ యువరాజ్ సూచించారు. పథకాల నిర్మాణం పూర్తికాగానే వాటిని పంచాయతీలు స్వాధీనం చేసుకోవాలన్నారు. సర్పంచ్‌లు, ఎంపీపీలు, జెడ్పీటీసీలు సమన్వయంతో తాగునీటి పథకాల నిర్వహణపై దృష్టి సారించాలన్నారు. తాగునీటి పథకాల మరమ్మతులకు మండల పరిషత్ నుంచి కూడా నిధులు కేటాయించి నిర్వహణను మెరుగుపరుచుకోవాలన్నారు.
  


 శీతల గిడ్డంగిలో నిల్వచేసి పట్టించుకోని అధికారులు
 ఎందుకూ పనికిరాకుండా పోయిన చింతపండు
 నిర్లక్ష్యం ఖరీదు రూ. కోటి
 భారం సేల్స్‌మెన్‌పై మోపేందుకు {పయత్నాలు
  
 చింతపల్లి:  తప్పు ఒకరు చేసి శిక్ష మరొకరికి వేస్తామన్న చందంగా గిరిజన సహకార సంస్థ ఉన్నతాధికారులు వ్యవహరిస్తున్నారు. గత ఏడాది ఏజెన్సీ 11 మండలాల్లో చింతపండు కొనుగోలుకు సేల్స్‌మెన్‌కు లక్ష్యాలు నిర్దేశించారు. కొనుగోలు చేసిన చింతపండును సకాలంలో అమ్మకుండా కోల్డు స్టోరేజ్‌లో  ఉంచారు. ఏడాది తరువాత ఎందుకూ పనికిరాకుండా పోయింది. ఆ భారం సేల్స్‌మెన్‌పై రుద్దేందుకు తాజాగా రంగం సిద్ధం చేస్తున్నారు. కొనుగోలు చేసిన ఒక్కో సేల్స్‌మేన్‌పై రూ.లక్షల్లో భారం పడనుంది. దీంతో బాధిత సేల్స్‌మెన్లు లబోదిబో మంటున్నారు. గిరిజనులు సేకరించిన అటవీ ఉత్పత్తులు కొనుగోలు చేయడంలో భాగంగా గత ఏడాది కిలో చింతపండు ధర రూ.22 నిర్ణయించారు. ఈ మేరకు లక్ష్యాలను నిర్దేశించి కొనుగోలు బాధ్యతలు శ్యాండిఇన్‌స్పెక్టర్లు, సేల్స్‌మెన్‌కు అప్పగించారు. జీసీసీ కొనుగోలు చేసిన చింతపండును నాణ్యంగా తయారుచేసి తిరుపతి, అన్నవరం, సింహాచలం వంటి ప్రముఖ దేవస్థానాలతో పాటు మన్యంలోని ప్రభుత్వ ఆశ్రమ పాఠశాలలకు పంపిణీ చేయాలని నిర్ణయించారు. ఉన్నతాధికారుల ఆదేశాల మేరకు సుమారు రూ. 48 లక్షలు విలువ చేసే 250 టన్నుల చింతపండును కొనుగోలు చేశారు. సరుకు రవాణా, కోల్డ్‌స్టోరేజ్ అద్దెలు కలుపుకుని ఏడాదికి దాదాపు రూ.కోటి  ఖర్చయినట్లు అధికారుల లెక్కల్లో తేలింది. కిలో రూ. 22కు కొనుగోలు చేసిన తరువాత భయట మార్కెట్‌లో ధరలు బాగా పెరిగాయి. వ్యాపారులు రూ.29కి కొనుగోలు చేసేవారు. అప్పట్లో చాలా మంది సేల్స్‌మెన్ బయట మార్కెట్‌లో అమ్ముదామని అధికారులకు సలహా ఇచ్చినా వారు అంగీకరించ లేదు. మరింత లాభాలు సాధించవచ్చని ఆశించారు.
 
 సరుకు నిల్వలో నిర్లక్ష్యం
 అంతవరకు బాగానే ఉన్నా కొన్న సరుకును భద్రపరిచే విషయంలో నిర్లక్ష్యం వహించారు. అనకాపల్లిలోని ప్రైవేటు కోల్డు స్టోరేజ్‌లో భద్రపరిచిన అధికారులు ఆ తరువాత దాని బాగోగులు పట్టించుకోలేదు. సంబంధిత అధికారుల పర్యవేక్షణ లోపం కారణంగా చింతపండు నిల్వలకు అవసరమైన ఏసీని అందించలేదు. దీంతో నిల్వచేసిన చింతపండంతా ఎందుకూ పనికిరాకుండా పోయింది. నెలకు సుమారు రూ.60 వేల   అద్దె చెల్లించిన అధికారులు  నిల్వ చేసిన చింతపండు ఎలా ఉందో నెలకు ఒకసారి కూడా వెళ్లి చూడక పోవడం వల్లే ఈ దుస్థితి నెలకొందని సేల్స్‌మెన్‌లు వాపోతున్నారు. పైగా తాము అప్పగించిన సరుకు బదులు వేరే సరుకు నిల్వ కేంద్రాల్లో ఉందని చెబుతున్నారు. దీనిపై సంబంధిత కోల్డ్‌స్టోరేజ్ సిబ్బందిని ప్రశ్నిస్తే చాలా మంది సరుకులు నిల్వ చేసుకుంటారని, ఎవరి సరుకులు వారు చూసుకోవాలని సమాధానం చెబుతున్నారన్నారు. జరిగిన నష్టం పూడ్చుకునేందుకు  జీతల్లో కోత  విధించేందుకు అధికారులు కసరత్తు చేస్తున్నట్లు సేల్స్‌మెన్‌లు చెబుతున్నారు. అదే జరిగితే తాము కోర్టును ఆశ్రయిస్తామని వారు హెచ్చరిస్తున్నారు. పాడైన చింతపండు తీసుకెళ్లి పాడేయాలన్నా మరో ఐదారు లక్షల రూపాయలు ఖర్చవుతుంది.
  
  


 ఇప్పటికే నన్నారీకి గిరాకీ
 సరికొత్తగా మార్కెట్లోకి ‘మారేడు’
  
  విశాఖపట్నం: గిరిజన సహకార సంస్థ (జీసీసీ)కి షర్బత్‌లు ఆదరణ తెచ్చిపెడుతున్నాయి. గత ఏడాది ఏప్రిల్‌లో తొలిసారిగా ప్రవేశపెట్టిన ఔషధ గుణాల నన్నారి (సుగంధిపాలు) షర్బత్‌కు అనూహ్య డిమాండ్ వచ్చింది. 2015లో 10 వేల నన్నారి బాటిళ్లను అమ్మాలనుకుంటే ఏకంగా లక్ష బాటిళ్లు అమ్ముడైపోయాయి. దీంతో అలాంటి ఔషధ లక్షణాలున్న మరో సమ్మర్ డ్రింకుకు జీసీసీ  శ్రీకారం చుడుతోంది. దానికి మారేడు (బిళ్వ) షర్బత్‌గా నామకరణం చేసింది. దీనిని ఈ నెల 29న రాజమండ్రిలో విడుదల చేయనుంది. మారేడు పండ్ల గుజ్జు నుంచి దీనిని తయారు చేస్తారు. ఈ మారేడు షర్బత్‌లో మధుమేహం, డయేరియా, అల్సర్‌ను నయం చేయడంతోపాటు బరువును తగ్గించే గుణం ఉందని, మలబద్ధకాన్ని నివారించే లక్షణాలున్నాయని  చెబుతున్నారు.
 
 తూర్పుగోదావరి జిల్లా రంపచోడవరం అటవీ ప్రాంతంలో మారేడు చెట్లు అధికంగా ఉన్నాయి. షర్బత్ తయారీకి అక్కడ నుంచి 50 క్వింటాళ్ల మారేడు పండ్లను జీసీసీ కొనుగోలు చేసి ఉంచింది. కిలోకు ఎనిమిది బాటిళ్ల మారేడు షర్బత్ వస్తుంది. చిత్తూరులో ఉన్న తేనె ప్రాసెసింగ్ యూనిట్‌లోనే నన్నారి షర్బత్ తయారవుతోంది. కొత్త మారేడు షర్బత్‌ను కూడా అక్కడే తయారు చేస్తున్నారు. త్వరలో రాజమండ్రి కంబాలచెరువులో ఉన్న తేనె ప్లాంట్‌లోనే ఈ షర్బత్‌ను తయారు చేయడానికి రూ.10 లక్షలు వెచ్చించి యంత్ర పరికరాలను ఆధునీకరిస్తున్నారు. ఇప్పటిదాకా నన్నారి, మారేడు షర్బత్‌లను ఏ ఇతర కంపెనీలు తయారు చేయడం లేదు. 750 మి.లీ. బాటిల్ ధరను రూ.100లుగా నిర్ణయించారు. నన్నారి కూడా ఇదే ధరకు విక్రయిస్తున్నారు. ఈ సంవత్సరం రెండు లక్షల నన్నారి సీసాలు అమ్ముడవుతాయని జీసీసీ అధికారులు అంచనా వేస్తున్నారు.
  
  


 విశాఖ జిల్లా గూడెంకొత్తవీధి మండలం టీములబండ గ్రామంలోని గిరిజన సహకార సంస్థ(జీసీసీ)కి చెందిన సరుకుల డిపోను మావోయిస్టులు ధ్వంసం చేశారు. ఆదివారం రాత్రి గ్రామంలోకి ప్రవేశించిన సుమారు 15 మంది మావోయిస్టులు కుంకుమపూడి గ్రామంలో నిర్వహించాల్సిన జీసీసీ డిపోను టీములబండలో ఏర్పాటు చేయడమేంటని ప్రభుత్వాన్ని ప్రశ్నించారు.
 ఈ విషయాన్ని అక్కడ గుమికూడిన గ్రామస్తులకు తెలిపారు. ఈ మేరకు జీసీ గోదాము తలుపులను, పైకప్పు రేకులను పగులగొట్టి వెళ్లిపోయారు. అయితే, గోదాములో సరుకులు ఏమీలేవని, వాటిని అప్పటికే తరలించారని సమాచారం.