న్యూఢిల్లీ: ప్రపంచ జూనియర్‌ రెజ్లింగ్‌ చాంపియన్‌షిప్‌లో 18 ఏళ్ల విరామం తర్వాత భారత్‌కు మళ్లీ స్వర్ణ పతకం లభించింది. ఎస్తోనియాలో జరుగుతున్న ఈ మెగా ఈవెంట్‌లో పురుషుల 86 కేజీల ఫ్రీస్టయిల్‌ విభాగంలో దీపక్‌ పూనియా విశ్వవిజేతగా అవతరించాడు. ఫైనల్లో అలిక్‌ షెబ్‌జుకోవ్‌ (రష్యా)పై దీపక్‌ విజయం సాధించాడు. చివరిసారి 2001లో భారత్‌ తరఫున ప్రపంచ జూనియర్‌ చాంపియన్‌షిప్‌లో రమేశ్‌ కుమార్‌ (69 కేజీలు), పల్విందర్‌ సింగ్‌ చీమా (130 కేజీలు) పసిడి పతకాలు గెలిచారు.  

న్యూఢిల్లీ: ప్రపంచ జూనియర్‌ రెజ్లింగ్‌ చాంపియన్‌షిప్‌ను భారత్‌ స్వర్ణం లేకుండానే ముగించింది. స్లొవేకియాలో ఆదివారం ముగిసిన ఈ మెగా ఈవెంట్‌లో చివరి రోజు భారత్‌కు మరో రజతం లభించింది. పురుషుల ఫ్రీస్టయిల్‌ 86 కేజీల విభాగంలో దీపక్‌ పూనియా రన్నరప్‌గా నిలిచాడు. టర్కీ రెజ్లర్‌ ఆరిఫ్‌ ఓజెన్‌తో జరిగిన ఫైనల్లో దీపక్‌ 1–2 పాయింట్ల తేడాతో ఓడిపోయాడు. ఫైనల్‌ చేరే క్రమంలో కేవలం తన ప్రత్యర్థులకు రెండు పాయింట్లు మాత్రమే సమర్పించుకున్న దీపక్‌ కీలక పోరులో మాత్రం దూకుడుగా ఆడలేకపోయాడు. తొలి సెషన్‌లోనే రెండు పాయింట్లు చేజార్చుకున్న దీపక్‌ బౌట్‌ ముగియడానికి రెండు సెకన్లు ఉందనగా ఒక పాయింట్‌ సంపాదించాడు. అయితే అప్పటికే ఆలస్యమైపోయింది. ఇదే టోర్నీలో 57 కేజీల విభాగంలో భారత రెజ్లర్‌ నవీన్‌ సిహాగ్‌ కూడా రజతం సాధించాడు. గ్రీకో రోమన్‌ విభాగంలో విజయ్‌ (57 కేజీలు) కాంస్యం నెగ్గగా... విజయ్‌ (60 కేజీలు), సజన్‌ భన్వాల్‌ (77 కేజీలు) రజతాలు గెలిచారు. మహిళల ఫ్రీస్టయిల్‌ విభాగంలో మాన్సి (57 కేజీలు), అన్షు (59 కేజీలు)లు కాంస్య పతకాలు  సొంతం చేసుకున్నారు.


 న్యూఢిల్లీ: ప్రపంచ జూనియర్ రెజ్లింగ్ చాంపియన్‌షిప్‌లో భారత రెజ్లర్ రవి కుమార్ రజత పతకం సాధించాడు. బ్రెజిల్‌లో జరిగిన ఈ మెగా ఈవెంట్‌లో పురుషుల 55 కేజీల విభాగంలో రవి కుమార్ రెండో స్థానంలో నిలిచాడు. ఫైనల్లో రవి 0-10 తేడాతో మాహిర్ అమీరాస్లనోవ్ (అజర్‌బైజాన్) చేతిలో ఓడిపోయాడు. అంతకుముందు తొలి రౌండ్‌లో రవి 12-8తో స్టీవెన్ మికిక్ (అమెరికా)పై, క్వార్టర్ ఫైనల్లో 9-5తో శామ్యూల్ జగాస్ (కెనడా)పై, సెమీస్‌లో 9-8తో జనాబజార్ జందాన్‌బుద్ (మంగోలియా)పై గెలుపొందాడు.