ములుగు (గజ్వేల్‌): మండల టీఆర్‌ఎస్‌ యూత్‌ విభాగ అధ్యక్షుడు బట్టు అంజిరెడ్డి తల్లి వజ్రమ్మ దశదిన కర్మ కార్యక్రమానికి ముఖ్యమంత్రి కె.చంద్రశేఖర్‌రావు ఆదివారం హాజరయ్యారు. పది రోజుల క్రితం ఆమె అనారోగ్యంతో మృతి చెందా రు. ఈ సందర్భంగా అంజిరెడ్డిని సీఎం పరామర్శించారు.  అనంతరం తిరుగు ప్రయాణంలో గ్రామంలోని తన చిన్ననాటి స్నేహితుడు, ఎర్రవల్లి ఫాంహౌస్‌ ఇన్‌చార్జి, వంటిమామిడి మార్కెట్‌ కమిటీ చైర్మన్‌ మహ్మద్‌ జహంగీర్‌ ఇంటికి చేరుకుని ఆయన కుటుంబ సభ్యులతో ముచ్చటించారు. 


 హైదరాబాద్: రాష్ట్ర యువజన కాంగ్రెస్ అధ్యక్షుడిగా ఎం.అనిల్‌కుమార్ యాదవ్ ఎన్నికయ్యారు. ఎన్నికల ఫలితాలను శనివారం ప్రకటించారు. సాధారణ ఎన్నికలను తలపించిన ఈ ఎన్నికల్లో అధ్యక్షపదవికోసం ఐదుగురు పోటీపడ్డారు.
 
 సమీప ప్రత్యర్థి రవికుమార్ యాదవ్‌పై అనిల్‌కుమార్ 1,856 ఓట్ల తేడాతో గెలుపొందారు. మాజీ ఎంపీ అంజన్‌కుమార్ యాదవ్ కుమారుడు అయిన అనిల్‌కుమార్‌కు ఈ ఎన్నికల్లో 4,379 ఓట్లు రాగా, మాజీ ఎమ్మెల్యే బిక్షపతి యాదవ్ కుమారుడు రవికుమార్ యాదవ్‌కు 2,523 ఓట్లు వచ్చాయి. మిగిలిన వారికి చెప్పుకోదగిన ఓట్లు రాలేదు.