మూడు నెలలుగా కూతురుపై లైంగికదాడి

సాక్షి, చింతపల్లి: కంటికి రెప్పలా కాపాడాల్సిన కన్నతండ్రి కామాంధుడిగా మారాడు. మూడు నెలలుగా కూతురుపై లైంగికదాడికి పాల్పడ్డాడు. బాలిక గర్భం దాల్చడంతో ఈ దారుణం వెలుగులోకి వచ్చింది. నల్లగొండ జిల్లా చింతపల్లి మండలం వర్కాల గ్రా మానికి చెందిన ఓ వ్యక్తి తన కుమార్తెను డిండిలోని ఓ పాఠశాలలో 9వ తరగతి చదివిస్తున్నాడు. కరోనా నేపథ్యంలో పాఠశాలలు మూసివేయడంతో ఆ బాలిక ఇంటివద్దే ఉంటోంది. ఈ క్రమంలోనే బాలికను బలవంతంగా లోబర్చుకున్నాడు. విషయం బయటికి చెప్పొద్దంటూ బెదిరింపులకు పాల్పడుతూ లైంగికదాడికి ఒడిగడుతున్నాడు.

ఇటీవల బాలిక అనారోగ్యానికి గురికావడంతో ఏమీ ఎరుగనట్లు భార్యతో కలసి కూతురును దేవరకొండలో ని ఓ ఆస్పత్రికి తీసుకెళ్లాడు. వైద్య పరీక్షల్లో బాలిక గర్భం దాల్చినట్లు డాక్టర్లు నిర్ధారించారు. ఇంటికి వచ్చిన తర్వాత కూతురిని తల్లి నిలదీయడంతో తండ్రి చేసిన నిర్వాకం చెప్పింది. ఈ విషయం  ఎవరికీ చెప్పొద్దని తల్లీకూతుళ్లను శనివారం రాత్రి ఇంట్లోనే బంధించి చితకబాదాడు. తట్టుకోలేకపోయిన ఆ బాలిక పోలీసులకు సమాచారం అందించడంతో నిందితుడిని అదుపులోకి తీసుకున్నారు.  పోక్సో చట్టం కింద కేసు నమోదు చేసుకుని దర్యాప్తు చేస్తున్నట్లు చింతపల్లి ఎస్‌ఐ తెలిపారు.