Devara Collections Day 3: మొదటి వారంలో సత్తా చాటిన 'దేవర'

ఎన్టీఆర్ నటించిన 'దేవర' భారీగానే కలెక్షన్లు రాబడుతుంది. మొదటి వీకెండ్‌లో బాక్సాఫీస్‌ వద్ద తారక్‌ సత్తా చాటాడు. మొదటిరోజు కాస్త మిక్సిడ్‌ టాక్‌ రావడంతో ఆ ప్రభావం రెండోరోజు కలెక్షన్లపై పడింది. అయితే, దేవరపై ఆడియన్స్‌ నుంచి వచ్చే రెస్సాన్స్‌ మారింది. సినిమా బాగుందని పాజిటివ్‌ టాక్‌ వస్తుండటంతో మూడోరోజు కలెక్షన్లు నిలకడగానే కొనసాగాయి. దీంతో మొదటి వీకెండ్‌లో దేవర భారీ కలెక్షన్లే క్రియేట్‌ చేశాడు.

కొరటాల శివ తెరకెక్కించిన దేవర సెప్టెంబర్‌ 27న విడుదలైంది. భారీ అంచనాలతో రిలీజ్‌ అయిన ఈ చిత్రం ప్రపంచవ్యాప్తంగా మూడురోజులకు గాను రూ. 304 కోట్ల గ్రాస్‌ కలెక్షన్లు రాబట్టింది. మొదటిరోజు ఏకంగా రూ. 172 కోట్లు రాబట్టిన దేవర.. రెండోరోజు రూ. 71కోట్లు, మూడోరోజు రూ. 61 కోట్లు రాబట్టాడు. అయితే, దేవరకు బాలీవుడ్‌లో రోజురోజుకు కలెక్షన్లు పెరుగుతుండటంతో ఎన్టీఆర్‌ అభిమానులు ఫుల్‌ ఖుషీ అవుతున్నారు.

ఇండియన్‌ బాక్సాఫీస్‌ వద్ద దేవర రూ. 500 కోట్ల మ్యాజిక్‌ టార్గెట్‌ను సులువుగానే అందుకునేలా ఉన్నాడు. ప్రస్తుతం మరే పెద్ద సినిమా కూడా దేవరకు పోటీగా లేకపోవడం బాగా కలిసోచ్చే అంశమని చెప్పవచ్చు. మరో రెండురోజుల్లో తెలుగురాష్ట్రాల్లో దసరా సెలవులు ప్రారంభం కానున్నాయి. దీంతో కుటుంబంతో పాటు రిపీటెడ్‌ ఆడియన్స్‌ కూడా దేవర థియేటర్‌ వైపు అడుగులేస్తారు. ఇలా చాలా అనుకూలా అంశాలు ఉన్నాయి కాబట్టి దేవర రూ. 500 కోట్ల మార్క్‌ కలెక్షన్లు అందుకోవడం పెద్ద కష్టం కాదని చెప్పవచ్చు.