నవ్వించడంతో పాటు థ్రిల్‌ చేస్తానంటున్న రకుల్‌

రకుల్‌ ప్రీత్‌ సింగ్‌ నవ్వించడానికి, థ్రిల్‌ చేయడానికి రెడీ అయ్యారు. ఆమెతో పాటు నీనా గుప్తా కూడా చేతులు కలిపారు. ఈ ఇద్దరూ కలిసి చేసే కామెడీ, థ్రిల్‌ని వచ్చే ఏడాది వెండితెరపై చూడొచ్చు. రకుల్, నీనా గుప్తా లీడ్‌ రోల్స్‌లో ఓ చిత్రం రూపొందనుంది. కామెడీ థ్రిల్లర్‌గా ఈ చిత్రాన్ని దర్శకుడు ఆశిష్‌ ఆర్‌. శుక్లా తెరకెక్కించనున్నారు. ఈ చిత్రాన్ని సునీల్‌ కేతర్‌పాల్‌ నిర్మించనున్నారు.

రకుల్‌ ఓ లీడ్‌ రోల్‌లో నటించిన ‘ఐ లవ్‌ యు’కి కూడా కేతర్‌పాల్‌నే నిర్మాత. ఈ ఏడాది జూన్‌లో ఈ చిత్రం ఓటీటీ ప్లాట్‌ఫామ్‌లో విడుదలైంది. అయితే తాజా చిత్రాన్ని మాత్రం థియేటర్స్‌లోనే విడుదల చేయాలనుకుంటున్నారు. ఈ చిత్రం షూటింగ్‌ని అక్టోబర్‌లో ఆరంభించి, డిసెంబర్‌కల్లా పూర్తి చేయాలనుకుంటున్నారు. వచ్చే ఏడాది ఆరంభంలో ఈ చిత్రం విడుదలయ్యే చాన్స్‌ ఉంది.