ఆట పూర్తయింది

‘గేమ్‌ చేంజర్‌’ ఆటను పూర్తి చేశారు రామ్‌చరణ్‌. ఆయన హీరోగా శంకర్‌ దర్శకత్వంలో రూపొందుతున్న పొలిటికల్‌ యాక్షన్‌ థ్రిల్లర్‌ మూవీ ‘గేమ్‌ చేంజర్‌’. ఈ చిత్రంలో కియారా అద్వానీ హీరోయిన్‌గా నటిస్తున్నారు. కాగా ఈ సినిమాలో రామ్‌చరణ్‌ వంతు షూటింగ్‌ శనివారంతో ముగిసిందని సమాచారం.

హైదరాబాద్‌లో జరిగిన ‘గేమ్‌ చేంజర్‌’ సినిమా కీలక సన్నివేశాల చిత్రీకరణలో రామ్‌చరణ్‌ పాల్గొన్నట్లుగా తెలిసింది. పొలిటికల్‌ యాక్షన్‌ థ్రిల్లర్‌ మూవీగా రానున్న ఈ సినిమాలో రామ్‌చరణ్‌ తండ్రీకొడుకుగా రెండు పాత్రల్లో కనిపిస్తారని టాక్‌. అంజలి, శ్రీకాంత్, ఎస్‌జే సూర్య, నవీన్‌చంద్ర, జయరాం, సునీల్‌ ఇతర కీలక పాత్రల్లో నటిస్తున్న ఈ సినిమాకు తమన్‌ స్వరకర్త. ‘దిల్‌’ రాజు, శిరీష్‌ నిర్మిస్తున్న ఈ సినిమా విడుదల తేదీపై త్వరలోనే ఓ స్పష్టత రానుంది.