‘జమిలి’ జేపీసీలో ప్రియాంక గాంధీ.. నామినేట్‌ చేయనున్న కాంగ్రెస్‌!

న్యూఢిల్లీ:లోక్‌సభలో తాజాగా ప్రవేశపెట్టిన జమిలి ఎన్నికల బిల్లును పరిశీలించే జేపీసీ  సభ్యుల జాబితాలో తమ పార్టీ తరపున ఎంపీ ప్రియాంక గాంధీ పేరును కూడా కాంగ్రెస్‌ చేర్చినట్లు తెలుస్తోంది. ప్రియాంకతో పాటు కాంగ్రెస్‌ తరపున జేపీసీలో  మనీశ్‌ తివారీ, రణ్‌దీప్‌ సూర్జేవాలా, సుఖ్‌దేవ్‌ భగత్‌ పేర్లు కూడా పరిశీలనలో ఉన్నట్లు సమాచారం. 

మరోవైపు ఈ కమిటీలో సభ్యులుగా కల్యాణ్‌ బెనర్జీ,సాకేత్‌ గోఖలేల పేర్లను తృణమూల్‌ కాంగ్రెస్ (టీఎంసీ) ప్రతిపాదించినట్లు తెలుస్తోంది. జమిలి ఎన్నికలకు సంబంధించి రాజ్యాంగ సవరణ బిల్లును ప్రవేశపెట్టేందుకు మంగళవారం లోక్‌సభలో ఓటింగ్‌ నిర్వహించిన విషయం తెలిసిందే. ఈ ఓటింగ్‌ మెజారిటీ సభ్యులు బిల్లు ప్రవేశపెట్టేందుకు ఓకే అనడంతో బిల్లును లోక్‌సభలో ప్రవేశపెట్టారు. 

అనంతరం బిల్లును అధ్యయనం కోసం జేపీసీకి పంపారు. ఈ పార్లమెంట్‌ సెషన్‌ మరో రెండు రోజులు మాత్రమే మిగిలి ఉండడంతో ఈలోపే జేపీసీ చైర్మన్‌, సభ్యులను ఫైనల్‌ చేయాలని ప్రభుత్వం భావిస్తున్నట్లు సమాచారం. జేపీసీ చైర్మన్‌గా బీజేపీ సభ్యుడే ఉంటారన్న విషయం తెలిసిందే. ఈ కమిటీ 90 రోజుల పాటు బిల్లును అధ్యయనం చేసి సవరణలను సూచిస్తుంది. 90 రోజుల తర్వాత కూడా కమిటీ గడువు పెంచాల్సిందిగా కోరే వెసులుబాటు ఉంది.