14వ రోజు కొనసాగిన రిలే దీక్షలు

గన్నవరం: స్థానిక పశువైద్య కళాశాల విద్యార్థులు ఉపకార వేతనాలు పెంపు కోరుతూ చేపట్టిన రిలే నిరాహార దీక్షలు ఆదివారం 14వ రోజుకు చేరుకున్నాయి. పలువురు పశువైద్య విద్యార్థులు దీక్షలో బైఠాయించారు. ఈ సందర్భంగా విద్యార్థులు తమ డిమాండ్లను పరిష్కరించాలని కోరుతూ పెద్ద ఎత్తున నినాదాలు చేశారు. మెడికల్‌, డెంటల్‌, ఆయుష్‌ విద్యార్థులకు నెలకు రూ. 23వేల నుంచి రూ. 26 వేలు స్టైఫండ్‌ చెల్లిస్తున్న ప్రభుత్వం వెటర్నరీ విద్యార్థులకు మాత్రం రూ. 7 వేలు ఇవ్వడం అన్యాయమన్నారు. స్టైఫండ్‌ పెంపు కోసం గత పదమూడేళ్లుగా ప్రభుత్వానికి విజ్ఞప్తులు చేస్తున్నప్పటికీ పాలకులు పట్టించుకోవడం లేదన్నారు. ఇప్పటికైనా ప్రభుత్వం స్పందించి మిగిలిన వైద్య విద్యార్థులతో సమానంగా వెటర్నరీ విద్యార్థులకు కూడా ఉపకార వేతనాలు చెల్లించాలని డిమాండ్‌ చేశారు.