Maharashtra New CM: మహారాష్ట్ర సీఎంగా దేవేంద్ర ఫడ్నవీస్‌

ముంబయి: మహా సస్పెన్స్‌కు తెరపడింది. మహారాష్ట్ర సీఎంగా బీజేపీ నేత దేవేంద్ర ఫడ్నవీస్‌ పేరును మహాయుతి కూటమి ప్రకటించింది. ముంబయిలో బుధవారం(డిసెంబర్‌4) జరిగిన శాసనసభాపక్ష సమావేశంలో బీజేఎల్పీ నేతగా బీజేపీ ఎమ్మెల్యేలు ఫడ్నవీస్‌ను ఎన్నుకున్నారు.

డిప్యూటీ సీఎంగా పదవి స్వీకరించేందుకు కేర్‌టేకర్‌ సీఎం, శివసేన చీఫ్‌ షిండే ఒప్పుకోవడంతో ఫడ్నవీస్‌ సీఎం కుర్చీలో కూర్చునేందుకు లైన్‌ క్లియరైంది. దీంతో ఫడ్నవీస్‌ గురువారం ముంబయిలోని ఆజాద్‌ గ్రౌండ్‌లో సీఎంగా ప్రమాణస్వీకారం చేయనున్నారు. ప్రభుత్వ ఏర్పాటుకు తమను ఆహ్వానించాల్సిందిగా మహాయుతి నేతలు బుధవారం గవర్నర్‌ను కలిసి కోరనున్నారు. 

కాగా, ఇటీవల జరిగిన మహారాష్ట్ర ఎన్నికల్లో బీజేపీ ఆధ్వర్యంలోని మహాయుతి కూటమి ఘన విజయం సాధించిన విషయం తెలిసిందే. అయితే కూటమిలోని ఇతర పార్టీలైన శివసేన(షిండే),ఎన్సీపీ(అజిత్‌పవార్‌)లలో ఏకాభిప్రాయం లేకపోవడంతో  సీఎం అభ్యర్థి ప్రకటనలో ఆలస్యమైంది. 

కూటమిలో సీఎం రేసు నుంచి అజిత్‌ పవార్‌ తొలుత తప్పుకున్నారు. శివసేన చీఫ్‌ షిండే మాత్రం కొన్ని రోజులు అలక బూనారు. దీంతో బీజేపీ పెద్దలు ఆయనను ఒప్పించి మంతత్రి పదవుల పంపిణీలో సముచిత ఫార్ములాను రూపొందించి సీఎంగా ఫడ్నవిస్‌ పేరును ఖరారు చేశారు. దీంతో మహారాష్ట్ర ఎన్నికలు ఫలితాలు వెలువడిన నాటి నుంచి కొనసాగుతున్న ఉత్కంఠకు ముగింపు పలికనట్లయింది.