ఎస్సీ కాలనీవాసులపై టీడీపీ శ్రేణుల బరితెగింపు 

పెదకూరపాడు: టీడీపీ నేత నారా లోకేశ్‌ పల్నాడు జిల్లా పెదకూర­పాడు మండలంలో శనివారం నిర్వ­హించిన యువగళం పాద­యాత్రలో ఆ పార్టీ కార్యకర్తలు అత్యు­­త్సాహం ప్రదర్శించారు. పాద­యాత్ర లగడపాడు గ్రామంలోకి ప్రవేశించిన వెంటనే.. రోడ్డు పక్కన ఉన్న ఎస్సీ కాలనీ వాసులు ఎప్పడో ఏర్పాటు చేసుకున్న వైఎస్సార్‌సీపీ జెండాలను తొలగించాలంటూ ఆందోళనకు దిగారు.

కొందరు టీడీపీ శ్రేణులు ముందుకొచ్చి ఆ జెండాలను తొలగించడంతో ఎస్సీ కాలనీ వాసులు, మహి­ళలు పెద్ద ఎత్తున తిరగబడ్డారు. తాము ఏర్పాటు చేసుకున్న జెండాలను ఎందుకు తొల­గించారంటూ టీడీపీ కార్యకర్తలను నిలదీశారు. ఒక దశలో ఇరువర్గాలు బాహాబాహీకి దిగాయి. పోలీసులు జోక్యం చేసుకుని నచ్చజెప్పారు. అయినా టీడీపీ శ్రేణులు రెచ్చగొట్టే ప్రయత్నం చేయడంతో ఎస్సీ కాలనీ మహిళలు తమ ఇళ్లలో ఉన్న సీఎం వైఎస్‌ జగన్‌ ఫొటోలు తెచ్చి.. జై జగన్‌.. అంటూ నినాదాలు చేశారు.

మా ఎస్సీలకు టీడీపీ ఏం చేసిందని ప్రశ్నించారు. దీంతో కొందరు టీడీపీ కార్యకర్తలు వాటర్‌ బాటిళ్లను మహి­ళలపైకి విసిరారు. ఆగ్రహించిన ఎస్సీ మహిళలు తీవ్ర స్థాయిలో ప్రతిఘటించారు. రెండు వర్గాలకు మధ్య పోలీసులు నిలబడి సర్దిచెప్పారు. అటుగా వెళుతున్న లోకేశ్‌ను చూసి.. జై జగన్‌ అంటూ ఎస్సీ కాలనీ మహిళలు పెద్ద ఎత్తున నినాదాలు చేశారు.