టాప్‌ సీడ్‌ జోడీని ఓడించిన అనిరుధ్‌–అర్జున్‌ ద్వయం

‘రాజ రాజ చోర’ వంటి హిట్‌ ఫిల్మ్‌ తర్వాత హీరో శ్రీవిష్ణు, దర్శకుడు హసిత్‌ గోలి కాంబినేషన్‌లో రూపొందుతున్న చిత్రం ‘శ్వాగ్‌’. టీజీ విశ్వప్రసాద్‌ ఈ సినిమాను నిర్మిస్తున్నారు. రీతూ వర్మ, మీరా జాస్మిన్, దక్షా నగార్కర్, శరణ్య ప్రదీప్, సునీల్, రవిబాబు ఇతర లీడ్‌ రోల్స్‌లో నటిస్తున్న ఈ సినిమా త్వరలోనే విడుదల కానుంది. తాజాగా ఈ సినిమాలో సింగరేణి అలియాస్‌ సంగ పాత్రలో శ్రీవిష్ణు నటిస్తున్నట్లుగా వెల్లడించి, ‘సింగరో సింగ’ అనే పాట లిరికల్‌ వీడియోను కూడా విడుదల చేశారు. ‘సింగరో సింగ.. అబ్బో సింగరో సింగ...’ అంటూ మొదలై, ‘పక్కక్‌ జరుగుర్రి... దండల్‌ గుచ్చుర్రీ... దండాలు గిండాలు పెట్టుర్రి... ఆస్తండు సింగ... సింగరో సింగ..’ అంటూ సాగే ఈ పాటకు వివేక్‌ సాగర్‌ స్వరాలందించగా నిక్లేష్‌ సుంకోజీ సాహిత్యం అందించారు. బాబా సెహగల్‌–వైకోమ్‌ విజయలక్ష్మి పాడారు.

విష్ణు మంచు హీరోగా నటిస్తున్న చిత్రం ‘కన్నప్ప’. ముఖేష్‌ కుమార్‌ సింగ్‌ దర్శకత్వం వహిస్తున్నారు. మంచు మోహన్‌బాబు నిర్మిస్తున్నారు. ప్రభాస్, మోహన్‌ బాబు, అక్షయ్‌ కుమార్, మోహన్‌ లాల్, శరత్‌ కుమార్, బ్రహ్మానందం, కాజల్‌ అగర్వాల్, మధుబాల, ప్రీతీ ముకుందన్‌ వంటి వారు ఇతర పాత్రల్లో నటిస్తున్నారు.ఈ సినిమాని డిసెంబరులో ప్రేక్షకుల ముందుకు తీసుకురానున్నట్లు గురువారం సోషల్‌ మీడియాలో పోస్ట్‌ చేశారు విష్ణు. అయితే విడుదల తేదీ ఎప్పుడన్నది మాత్రం స్పష్టం చేయలేదు. శివ భక్తుడైన కన్నప్ప కథతో ‘కన్నప్ప’ రూపొందుతోంది. తెలుగు, తమిళ, మలయాళ, కన్నడ, హిందీ, ఇంగ్లిష్‌ భాషల్లో ఈ సినిమా విడుదల కానున్న సంగతి తెలిసిందే.

అల్లు అర్జున్‌ హీరోగా తెరకెక్కుతోన్న చిత్రం ‘పుష్ప: ది రూల్‌’. ఈ చిత్రం తాజా షెడ్యూల్‌ షూటింగ్‌కి రెడీ సెట్‌ గో అంటున్నారు మేకర్స్‌. సుకుమార్‌ దర్శకత్వం వహిస్తున్న ఈ చిత్రంలో రష్మికా మందన్న హీరోయిన్‌గా నటిస్తున్నారు. మైత్రీ మూవీ మేకర్స్, సుకుమార్‌ రైటింగ్స్‌పై నవీన్‌ ఎర్నేని, వై. రవిశంకర్‌ నిర్మిస్తున్నారు. ‘పుష్ప: ది రైజ్‌’ (2021) వంటి బ్లాక్‌బస్టర్‌ మూవీకి సీక్వెల్‌గా సేమ్‌ కాంబినేషన్‌లో ‘పుష్ప: ది రూల్‌’ రూపొందుతోంది.షెడ్యూల్‌ ప్రకారం చిత్రీకరణ పూర్తి అయ్యుంటే ఆగస్టు 15న ఈ సినిమా విడుదల కావాల్సి ఉంది. అయితే షూటింగ్‌ సకాలంలో పూర్తి కాకపోవడం.. క్వాలిటీ విషయంలో చిత్రయూనిట్‌ రాజీ పడకపోవడంతో ఈ మూవీని డిసెంబర్‌ 6న విడుదల చేయనున్నట్లు చిత్రబృందం ప్రకటించిన సంగతి తెలిసిందే. ఇక తాజా షెడ్యూల్‌ విషయానికి వస్తే.. ఈ నెల 22 లేదా 25న ప్రారంభం అవుతుందట. ఈ నెల 28 నుంచి అల్లు అర్జున్‌ కూడా చిత్రీకరణలో పాల్గొంటారని సమాచారం. శరవేగంగా చిత్రీకరణ, పోస్ట్‌ప్రోడక్షన్‌ పనులు పూర్తి చేసి, డిసెంబరు 6నే సినిమాని విడుదల చేయాలని మేకర్స్‌ ఫిక్స్‌ అయ్యారని భోగట్టా.

‘రం రం ఈశ్వరం... హం పరమేశ్వరం... యం యం కింకరం... వం గంగాధరం...’ అంటూ మొదలవుతుంది ‘రం రం ఈశ్వరం’ పాట. అశ్విన్‌బాబు, దిగంగనా సూర్యవంశీ జంటగా నటించిన ‘శివం భజే’ సినిమాలోనిది ఈ పాట. ఆధ్యాత్మిక అంశాల మేళవింపుతో రూపొందిన ఈ సస్పెన్స్‌ థ్రిల్లర్‌ మూవీని అప్సర్‌ దర్శకత్వంలో మహేశ్వర్‌ రెడ్డి మూలి నిర్మించారు.ఈ చిత్రం ఆగస్టు 1న విడుదల కానుంది. ఈ సినిమాలోని ‘రం రం ఈశ్వరం’ పాట లిరికల్‌ వీడియోను సంగీత దర్శకుడు తమన్‌ ‘ఎక్స్‌’లో షేర్‌ చేశారు. సంగీత దర్శకుడు వికాస్‌ బడిస సారథ్యంలో పూర్ణాచారి సాహిత్యం అందించిన ఈ పాటను సాయిచరణ్‌ పాడారు. ‘‘మా సినిమా చిత్రీకరణ పూర్తయింది. నిర్మాణానంతర కార్యక్రమాలు తుది దశకు చేరుకున్నాయి’’ అన్నారు మహేశ్వర్‌ రెడ్డి.

దీపావళికి థియేటర్స్‌కు వస్తున్నాడు మెకానిక్‌ రాకీ. విశ్వక్‌ సేన్‌ టైటిల్‌ రోల్‌లో నటిస్తున్న తాజా చిత్రం ‘మెకానిక్‌ రాకీ’. ఈ చిత్రంలో మీనాక్షీ చౌదరి హీరోయిన్‌. రవితేజ ముళ్లపూడి దర్శకత్వంలో రామ్‌ తాళ్లూరి నిర్మిస్తున్న యాక్షన్‌ చిత్రం ఇది.ఈ చిత్రాన్ని అక్టోబరు 31న దీపావళి సందర్భంగా విడుదల చేయనున్నట్లుగా గురువారం ప్రకటించి, విశ్వక్‌ కొత్త పోస్టర్‌ను కూడా విడుదల చేశారు మేకర్స్‌. కామెడీ, యాక్షన్‌ అంశాల మేళవింపుతో రూపొందుతున్న ఈ చిత్రానికి సంగీతం: జేక్స్‌ బిజోయ్‌ స్వరకర్త.