మళ్లీ ఓడిన నాదల్‌

రోమ్‌: గాయంనుంచి కోలుకొని మళ్లీ కోర్టులోకి అడుగు పెట్టిన తర్వాత రాణించలేకపోతున్న టెన్నిస్‌ దిగ్గజం రాఫెల్‌ నాదల్‌కు మరో పరాజయం ఎదురైంది. గత వారమే మాడ్రిడ్‌ ఓపెన్‌లో ఓడిన నాదల్‌ ఇప్పుడు ఇటాలియన్‌ ఓపెన్‌ రెండో రౌండ్‌లోనే వెనుదిరిగాడు. ఈ క్లే కోర్టు టోర్నీలో 10 సార్లు చాంపియన్‌గా నిలిచిన నాదల్‌పై 6–1, 6–3 స్కోరుతో వరల్డ్‌ నంబర్‌ 9 హ్యూబర్ట్‌ హర్కాజ్‌ (పోలండ్‌) ఘన విజయం సాధించాడు.

గత ఏడాదిన్నర కాలంలో నాదల్‌ టాప్‌–10 ర్యాంకుల్లో ఉన్న ఆటగాడితో తలపడటం ఇదే మొదటిసారి.  93 నిమిషాల్లో ముగిసిన ఈ మ్యాచ్‌లో నాదల్‌ 4 గేమ్‌లే గెలవడం అతని పరిస్థితిని చూపిస్తోంది. తాజా ప్రదర్శన తాను ఫ్రెంచ్‌ ఓపెన్‌లో ఆడే విషయంపై సందేహాలు లేవనెత్తుతోందని మ్యాచ్‌ ముగిసిన తర్వాత నాదల్‌  వ్యాఖ్యానించాడు.