TV
వెస్టిండీస్‌ విధ్వంసకర ఆటగాడు నికోలస్ పూరన్ అరుదైన ఘనత సాధించాడు. అంతర్జాతీయ టీ20ల్లో వెస్టిండీస్‌ తరపున అత్యధిక పరుగులు చేసిన ప్లేయర్‌గా పూరన్ రికార్డులకెక్కాడు. టీ20 వరల్డ్‌కప్‌-2024లో భాగంగా ట్రినిడాడ్‌ వేదికగా న్యూజిలాండ్‌తో జరిగిన మ్యాచ్‌లో 17 పరుగులు చేసిన పూరన్.. ఈ అరుదైన ఫీట్‌ను తన పేరిట లిఖించుకున్నాడు.
పూరన్ ఇప్పటివరకు విండీస్‌ తరపున 91 టీ20లు ఆడి 1914 పరుగులు చేశాడు. పూరన్ కెరీర్‌లో 11 హాఫ్‌ సెంచరీలు ఉన్నాయి. ఇంతకుముందు ఈ రికార్డు వెస్టిండీస్‌ దిగ్గజం, యూనివర్సల్‌ బాస్‌ క్రిస్‌ గేల్‌ పేరిట ఉండేది. విండీస్‌ తరపున 79 మ్యాచ్‌లు ఆడిన గేల్‌ 1899 పరుగులు చేశాడు.
తాజా మ్యాచ్‌తో గేల్‌ అల్‌టైమ్‌ రికార్డును పూరన్ బ్రేక్‌ చేశాడు. ఇక ఈ మ్యాచ్‌ విషయానికి వస్తే.. న్యూజిలాండ్‌పై 13 పరుగుల తేడాతో విండీస్‌ విజయం సాధించింది.
దీంతో సూపర్‌-8కు కరేబియన్‌ జట్టు అర్హత సాధించింది. అదే విధంగా విండీస్‌ చేతిలో ఓటమి చవిచూసిన కివీస్‌.. తమ సూపర్‌-8 అవకాశాలను సంక్లిష్టం చేసుకుంది.
