ఓటమితో కెరీర్‌ను ముగించిన నదాల్‌

టెన్నిస్‌ దిగ్గజం, స్పానిష్‌ బుల్‌ రఫేల్‌ నదాల్‌ తన సెన్సేషనల్‌ కెరీర్‌లో చివరి మ్యాచ్‌ ఆడేశాడు. నదాల్‌ తన కెరీర్‌ను ఓటమితో ముగించాడు. డేవిస్‌ కప్‌లో స్పెయిన్‌ నెదర్లాండ్స్‌ చేతిలో ఓడటంతో నదాల్‌ కెరీర్‌ ముగిసింది. నదాల్‌ తన చివరి మ్యాచ్‌లో బోటిక్‌ వాన్‌ డి జాండ్‌స్కల్ప్‌ చేతిలో వరుస సెట్లలో (4-6, 4-6) ఓడాడు. 

డేవిస్‌ కప్‌ క్వార్టర్‌ ఫైనల్లో నెదర్లాండ్స్‌ స్పెయిన్‌పై 2-1 తేడాతో గెలుపొందింది. తొలి సింగిల్స్‌లో నదాల్‌ ఓడగా.. రెండో సింగిల్స్‌లో కార్లోస్‌ అల్‌కరాజ్‌.. టల్లోన్‌ గ్రీక్‌స్పూర్‌ను 7-6 (7/0), 6-3 తేడాతో ఓడించాడు. డిసైడర్‌ డబుల్స్‌లో డచ్‌ జంట విజేతగా నిలిచి సెమీస్‌కు చేరింది. సెమీస్‌లో నెదర్లాండ్స్‌ కెనడా లేదా జర్మనీతో తలపడుతుంది.

కాగా, డేవిస్‌ కప్‌తో ఆటకు వీడ్కోలు పలుకుతానని నదాల్‌ గత నెలలో ప్రకటించిన విషయం తెలిసిందే. నదాల్‌ తన కెరీర్‌లో 22 గ్రాండ్‌స్లామ్‌లు సాధించాడు. 38 ఏళ్ల నదాల్‌ గత కొంతకాలంగా గాయాలతో సతమతమవుతున్నాడు. ఈ ఏడాది జులై నుంచి నదాల్‌ ఒక్క మ్యాచ్‌ కూడా ఆడలేదు. 

నదాల్‌ తన చివరి మ్యాచ్‌ సందర్భంగా తీవ్రమైన భావోద్వేగానికి లోనయ్యాడు. స్పానిష్‌ బుల్‌ను చివరి సారి బరిలో చూసేందుకు దాదాపు 10000 అభిమానులు ఎరినాకు వచ్చారు. రఫా.. రఫా అనే కేకేలతో మైదానం మార్మోగింది. స్పెయిన్‌ జాతీయ గీతాలాపన సందర్భంగా నదాల్‌ కన్నీళ్లు ఆపుకోలేకపోయాడు.