మహబూబాబాద్‌ అర్బన్‌: ఇంటర్మీడియట్‌ కార్పొరేట్‌ కళాశాలల్లో 2024–25 విద్యా సంవత్సరంలో ప్రవేశాలకు ప్రభుత్వ పాఠశాలల్లో చదివిన విద్యార్థులు నేటి నుంచి ఈ నెల 30వ తేదీ వరకు ఆన్‌లైన్‌లో దరఖాస్తు చేసుకోవాలని జిల్లా షెడ్యూల్డ్‌ కులాల అభివృద్ధి శాఖ అధికారి బి.బాలరాజు మంగళవారం తెలిపారు. 7జీపీఏ, ఆ పైగా ఫలితాలు సాధించిన ప్రభుత్వ పాఠశాలలు, గురుకులాలు, బెస్ట్‌ అవైలబుల్‌ స్కూళ్లలో చదివిన విద్యార్థులు మాత్రమే అర్హులన్నారు. ఎస్సీ, ఎస్టీ, బీసీ, ఈబీసీ, మైనార్టీ, దివ్యాంగ విద్యార్థులు ప్రవేశం పొందే అవకాశం ఉందన్నారు. జూన్‌ 3న సీజీజీ ఆన్‌లైన్‌ ఆటోమెటిక్‌ సిస్టమ్‌ ద్వారా విద్యార్థులను ఎంపిక చేస్తారని, జూన్‌ 6న ఎస్సీ కార్యాలయ అధికారులు సర్టిఫికెట్‌ వెరిఫికేషన్‌ చేస్తారన్నారు. అర్హులు కుల, ఆదాయం, పదో తరగతి పాస్‌ మార్కుల మెమో, ఆధార్‌కార్డు, రేషన్‌కార్డు, బ్యాంకు పాస్‌బుక్‌, దివ్యాంగ ధ్రువీకరణ పత్రం, స్టడీ సర్టిఫికెట్స్‌ (నాలుగు నుంచి పదో తరగతి వరకు తెలంగాణలో చదివి ఉండాలి) హాస్టల్‌ బోనఫైడ్‌ సర్టిఫికెట్‌, రెండు పాస్‌ఫొటోలు అందజేయాలన్నారు. పూర్తి వివరాలకు జిల్లా షెడ్యూల్డ్‌ కులాల అభివృద్ధి కార్యాలయంలో సంప్రదించాలని సూచించారు.

కేయూ క్యాంపస్‌ : కాకతీయ యూనివర్సిటీ హాస్టళ్ల డైరెక్టర్‌గా ఫార్మసీ కళాశాల డీన్‌ గాదె సమ్మయ్యను మంగళవారం రాత్రి నియమించారు. ఈమేరకు కేయూ రిజిస్ట్రార్‌ మల్లారెడ్డి ఉత్తర్వులు జారీచేశారు. ఈమేరకు నియామక ఉత్తర్వు కాపీ ని వీసీ రమేశ్‌.. సమ్మయ్యకు అందజేశారు. సమ్మయ్య గతంలో కేయూ అంబేడ్కర్‌ స్టడీస్‌ సెంటర్‌ డైరెక్టర్‌గా, ఫార్మసీ క ళాశాల ప్రిన్సిపాల్‌గా, బోర్డు ఆఫ్‌ స్టడీస్‌ చైర్మన్‌గా బాధ్యతలు నిర్వర్తించారు. నేడు ఆయన బాధ్యతలు స్వీకరించనున్నారు. కాగా, కేయూ హాస్టళ్ల డైరెక్టర్‌ శ్రీనివాస్‌రావు మంగళవారం తన పదవికి రాజీనామా చేశారు. పద్మాక్షి మహిళా హాస్టల్‌ వ ద్ద విద్యార్థినులు మెస్‌ ఓపెన్‌ చేయాలని ఆందోళన చేయడం, వాగ్వాదానికి దిగడంతో మనస్తాపానికి గురైన ఆయన.. తన పదవికి రాజీనామా చేశారని తెలుస్తోంది. శ్రీనివాస్‌రావు స్థానంలో సమ్మయ్యను నియమించారు. ఉత్తర్వులు జారీచేసిన రిజిస్ట్రార్‌ మల్లారెడ్డి

నెహ్రూసెంటర్‌: జిల్లాలో సికిల్‌సెల్‌ ఎనిమియా వ్యాధి నివారణకు వైద్యారోగ్యశాఖ ఆధ్వర్యంలో చర్యలు తీసుకుంటున్నారు. జన్యుపరంగా కుటుంబ సభ్యుల నుంచి సంక్రమించడంతో పాటు ఒకరికి నుంచి మరొకరికి ఈ వ్యాధి సంక్రమించే అవకాశం ఉంది. ఈమేరకు ప్రజలకు అవగాహన కార్యక్రమాలు నిర్వహించడంతో పాటు ఏజెన్సీ, మైదాన ప్రాంతాల్లో మొదటి విడత స్క్రీనింగ్‌ పరీక్షలు నిర్వహిస్తున్నారు. కాగా ఇప్పటివరకు 70వేల మందికి పరీక్షలు నిర్వహించగా.. ఇద్దరు వ్యాధిగ్రస్తులను గుర్తించారు. అలాగే 190 మంది క్యారియర్లను గుర్తించారు. కాగా వీరు మరొక సికిల్‌సెల్‌ క్యారియర్‌ను పెళ్లి చేసుకోవడం ద్వారా వారికి పుట్టబోయే పిల్లలకు వ్యాధి సక్రమించనుంది. ఇలాంటి వారు పెళ్లిళ్లు చేసుకోకపోవడమే మంచిదని వైద్యులు చెబుతున్నారు. వైద్య సిబ్బందికి శిక్షణ.. సికిల్‌ సెల్‌ ఎనిమియా వ్యాధి గుర్తింపులో భాగంగా స్క్రీనింగ్‌ పరీక్షల కోసం వైద్యారోగ్యశాఖ ఆధ్వర్యంలో మెడికల్‌ ఆఫీసర్లు, ఏఎన్‌ఎంలు, ఎంఎల్‌హెచ్‌పీలకు శిక్షణ కార్యక్రమాలు చేపట్టారు. వ్యాధిపై అవగాహన, పరీక్షలు, చికిత్సలపై శిక్షణ అందించారు. 0నుంచి 40 సంవత్సరాల వరకు.. సికిల్‌సెల్‌ వ్యాధి గుర్తింపు కోసం 0నుంచి 40ఏళ్ల లోపు వారందరికీ వైద్యాధికారులు, వైద్య సిబ్బంది పరీక్షలు నిర్వహిస్తున్నారు. ఏజెన్సీ, గిరిజన ప్రాంతాల్లో మొదటి విడతలో స్క్రీనింగ్‌ నిర్వహిస్తూ వ్యాధిపై అవగాహన కల్పిస్తున్నారు. ప్రతి ఒక్కరు వ్యాధి పరీక్షల కోసం తమ ఆధార్‌కార్డును అప్‌డేట్‌ చేసుకుని మొబైల్‌ నంబర్‌ లింక్‌ చేసుకోవాలని, అభా (ఆయుష్మాన్‌ భారత్‌ హెల్త్‌ ఖాతా) కార్డును పొందాలని సూచిస్తున్నారు. వ్యాధి పరీక్షల అనంతరం వైద్య చికిత్స కోసం ఈ కార్డు ఉపయోగపడుతుందని తెలుపుతున్నారు. వ్యాధి లక్షణాలు.. ఈ వ్యాధి బారిన పడుతున్న వారిలో ముఖ్యంగా కాళ్లు, చేతులు నొప్పితో కూడిన వాపు, రక్తహీనత, కీళ్లకు రక్తప్రసరణ ఆగిపోవడం, ఎముకల్లో కొన్ని గంటల పాటు దీర్ఘకాలిక నొప్పి ఉంటుంది. ఇది జన్యు సంబంధిత దీర్ఘకాలిక వ్యాధి కాగా కుటుంబంలో ఒకరి నుంచి మరొకరికి సంభవిస్తుంది. ఈ వ్యాధికి పూర్తి చికిత్స లేదు. సికిల్‌సెల్‌ క్యారియర్లను గుర్తించి వారి మధ్య వివాహలను నిరోధించడం ద్వారా ఈ వ్యాధిని కొంత మేరకు నివారించవచ్చని వైద్యులు తెలుపుతున్నారు. వ్యాధికి కచ్చితమైన చికిత్స లేకపోయినా మూలకణాల మార్పిడి, బోన్‌మారో ట్రాన్స్‌ప్లాంట్‌ అంటే కణాల మార్పిడితో వ్యాధిని కొంత వరకు నయం చేయవచ్చని వైద్య నిపుణులు చెబుతున్నారు. గిరిజనులపై తీవ్ర ప్రభావం.. సికిల్‌సెల్‌ ఎనిమియా వ్యాఽధి ఏజెన్సీ, గిరిజన ప్రాంతాల్లో ఎక్కువగా ప్రభలే అవకాశాలు ఉన్నాయి. గిరిజన సమూహాలు ఎక్కువగా ఉన్న ప్రాంతాల్లో వ్యాధి బారిన పడే ప్రమాదముందని, అక్కడ ఉంటున్న ప్రజలకు అవగాహన కార్యక్రమాలు నిర్వహించడంతో పాటు స్క్రీనింగ్‌ పరీక్షలను నిర్వహిస్తున్నారు. జిల్లాలో మొదటి విడత స్క్రీనింగ్‌లో భాగంగా గార్ల, బయ్యారం, గంగారం, కొత్తగూడ, గూడూరుతో పాటు మరికొన్ని ప్రాంతాల్లో ఎక్కువ మందికి వ్యాధి పరీక్షలను నిర్వహించినట్లు అధికారులు చెబుతున్నారు. ఆయా ప్రాంతాల్లోని పీహెచ్‌సీలో వైద్యాధికారులు, ఏఎన్‌ఎంలు, ఎంఎల్‌హెచ్‌పీలు అందుబాటులో ఉంటారని, ప్రతి ఒక్కరు స్క్రీనింగ్‌ చేసుకోవాలని సూచిస్తున్నారు. గిరిజన ప్రాంతాలతో పాటు గిరిజనేతర ప్రాంతాల్లో కూడా పరీక్షలను నిర్వహిస్తున్నారు. వైద్య పరీక్షలు చేయించుకోవాలి ప్రతి ఒక్కరు సికిల్‌సెల్‌ వ్యాఽధి నిర్ధారణ కోసం నిర్వహించే పరీక్షలను చేయించుకోవాలి. వ్యాధి ముందస్తుగా నిర్ధారణ జరిగితే తద్వారా మరొకరికి సోకకుండా జాగ్రత్తలు తీసుకోవచ్చు. 0నుంచి 40 సంవత్సరాల లోపు వారందరికీ పరీక్షలు నిర్వహిస్తున్నాం. అనుమానితులు ఎవరున్నా సమీపంలోని పీహెచ్‌సీలలో పరీక్షలు చేయించుకోవచ్చు. వైద్య చికిత్సల కోసం వైద్యాధికారులను సంప్రదించాలి. – ఏ.నాగేశ్వర్‌రావు, ప్రోగ్రాం ఆఫీసర్‌ సికిల్‌సెల్‌ ఎనిమియా నివారణకు వ్యూహం ఫస్ట్‌ విడతలో 70వేల మందికి స్క్రీనింగ్‌ 190 మంది క్యారియర్స్‌, ఇద్దరు వ్యాధిగ్రస్తుల గుర్తింపు ఏజెన్సీ ప్రాంతాలపై వైద్యాధికారుల ప్రత్యేక దృష్టి

జనగామ రూరల్‌: రోడ్డు ప్రమాదంలో ఓ యువకుడు దుర్మరణం చెందాడు. ఈ ఘటన పట్టణంలోని విజయ డెయిరీ బైపాస్‌ వద్ద చోటు చేసుకుంది. పోలీసుల కథనం ప్రకారం.. పాల కేంద్ర ఏరియాకు చెందిన మునుకుంట్ల రవి (37) సోమవారం రాత్రి తన పని ముగించుకుని ద్విచక్రవాహనంపై ఇంటికి వస్తున్నాడు. ఈ క్రమంలో హనుమాన్‌ గుడి వద్ద వెనక నుంచి యశ్వంతాపూర్‌ నుంచి జనగామకు వస్తున్న కారు ఢీకొంది. ఈ ఘటనలో రవికి తీవ్రగాయాలయ్యాయి. గమనించిన స్థానికులు వెంటనే రవిని ఏరియా ఆసుపత్రికి తరలిస్తున్న క్రమంలో మృతిచెందాడు. ఈ ఘటనపై కేసు నమోదు చేసి దర్యాప్తు చేపడుతున్నట్లు ఎస్సై సృజన్‌ తెలిపారు. మృతుడికి భార్య ఇద్దరు పిల్లలు ఉన్నారు. ఏటూరునాగారంలో మరో యువకుడు.. ఏటూరునాగారం: రోడ్డు ప్రమాదంలో ఓ యువకుడు దుర్మరణం చెందాడు. ఈ ఘటన మంగళవారం రాత్రి ఏటూరునాగారంలో జరిగింది. పోలీ సుల కథనం ప్రకారం మంగపేట మండలం కమలాపురం గ్రామానికి చెందిన గుగ్గిల్ల రమేశ్‌(38) పని నిమిత్తం ద్విచక్రవాహనంపై ఏటూరునాగారం మండలం రొయ్యూరు గ్రామానికి వెళ్లాడు. తిరుగు ప్రయాణంలో మండల కేంద్రంలోని 163 జాతీయ రహదారిపై ఉన్న హైవే ట్రీట్‌ హోటల్‌ వద్ద రోడ్డు ప్రమాదానికి గురై అక్కడికక్కడే మృతి చెందాడు. విషయం తెలుసుకున్న పోలీసులు ఘటనా స్థలికి చేరుకుని మృతదేహాన్ని ఏటూరునాగారం ఆసుపత్రికి తరలించారు. అనంతరం కేసు నమోదు చేసి దర్యాప్తు చేస్తున్నట్లు ఎస్సై కృష్ణప్రసాద్‌ తెలిపారు. అయితే రమేశ్‌ను గుర్తుతెలియని వాహనం ఢీకొందా..? లేదా పార్కింగ్‌ చేసి ఉన్న లారీని ఢీకొని మృతి చెందడా అనే విషయం తెలియాల్సి ఉంది.

డోర్నకల్‌: పరిసరాలను పరిశుభ్రంగా ఉంచుతూ దోమల వ్యాప్తిని అరికట్టేందుకు చర్యలు చేపట్టాలని డీఎంహెచ్‌ఓ బి.కళావతిబాయి ఆదేశించారు. మండలంలోని చాప్లాతండా శివారు దారావత్‌తండాను మంగళవారం వైద్య సిబ్బందితో కలిసి ఆమె సందర్శించారు. ఇటీవల తండాలో ఐదు డెంగీ పాజిటివ్‌ కేసులు నమోదు కావడంతో.. వ్యాధిబారిన పడిన వారి ఇళ్లతో పాటు పరిసరాల్లోని 62 ఇళ్లను పరిశీలించారు. ఇళ్ల పరిసరాలు, నీటి తొట్టెలు పరిశీలించి స్థానికులతో మాట్లాడిన డీఎంహెచ్‌ఓ డెంగీ వ్యాప్తి చెందకుండా తీసుకోవాల్సిన జాగ్రత్తల గురించి వివరించారు. మధ్యాహ్నం దోమలు కుట్టడం ద్వారా డెంగీ వ్యాప్తి చెందుతుందని, ఇళ్ల పరిసరాల్లో నీటి నిల్వలు లేకుండా జాగ్రత్తలు తీసుకోవాలన్నారు. మంగళ, శుక్రవారాల్లో డ్రై డే, ఫ్రైడేలు నిర్వహించి పరిసరాలను పరిశుభ్రంగా ఉంచుకోవాలన్నారు. కార్యక్రమంలో ప్రోగ్రాం అధికారులు డాక్టర్‌ నాగేశ్వర్‌రావు, డాక్టర్‌ శ్రవణ్‌, ఇన్‌చార్జ్‌ డీపీహెచ్‌ఎన్‌ఓ మంగమ్మ, పీహెచ్‌సీ సిబ్బంది పాల్గొన్నారు. మెరుగైన వైద్య సేవలు అందించాలి గూడూరు: జాతీయ ఆరోగ్య కార్యక్రమాల ద్వారా ప్రజలకు మెరుగైన వైద్య సేవలు అందించాలని డిప్యూటీ డీఎంహెచ్‌ఓ అంబరీష అన్నారు. మండలంలోని అయోధ్యపురం, తీగలవేణి పీహెచ్‌సీలతో పాటు గాజులగట్టులోని ఆయుష్మాన్‌ ఆరోగ్య మందిరాలను మంగళవారం ఆయన తనిఖీ చేశారు. ఈ సందర్భంగా ఆస్పత్రుల్లో సిబ్బంది విధుల నిర్వహణ, ఆరోగ్య పరీక్షలు, మందుల నిల్వలకు సంబంధించిన రికార్డులను పరిశీలించారు. ఆయుష్మాన్‌ ఆరోగ్య మందిరాల్లో అందిస్తున్న వైద్య సేవల గురించి వైద్యులు, సిబ్బందిని అడిగి తెలుసుకున్నారు. వైద్యులు, సిబ్బంది సమయానికి హాజరై విధులు నిర్వర్తించాలని సూచించారు. జాతీయ ఆరోగ్య కార్యక్రమాల వివరాలను ఎప్పటికప్పుడు ఆన్‌లైన్‌లో పొందుపర్చాలన్నారు. కార్యక్రమంలో వైద్యులు రాంబాబు, యమున, దేవేందర్‌, పుష్పలత, సబ్‌ యూనిట్‌ ఆఫీసర్‌ వి.శ్రీనివాస్‌, సీహెచ్‌ఓ కృష్ణార్జున్‌, కోమల, సిబ్బంది షానుబేగం, ఫార్మసిస్టు అమల, సిబ్బంది పాల్గొన్నారు. నిరుపయోగంగా ఎస్సీ దుకాణ సముదాయం మహబూబాబాద్‌ అర్బన్‌: జిల్లా కేంద్రంలోని ప్రభుత్వ జనరల్‌ ఆస్పత్రి ఎదురుగా షెడ్యూల్‌ కులాల (ఎస్సీ)కు సంబంధించిన దుకాణ సముదాయం నిరుపయోగంగా మారింది. ఇక్కడ సుమారు 10 షెటర్లు ఉన్నాయి. మరమ్మతులు చేయించి అర్హులైన దళిత కుటుంబాలకు కేటాయిస్తే అభివృద్ధి చెందుతాయి. కాగాఅధికారులు చొరవ తీసుకొని పూర్తిస్థాయిలో మరమ్మతులు చేపట్టి కేటాయించాలని పలువురు కోరుతున్నారు. తాటి ముంజలకు భలే గిరాకీ.. జిల్లా కేంద్రంలోని అండర్‌బ్రిడ్జి, రామాలయం గుడి ఎదురుగా తాటి ముంజలను విక్రయిస్తున్నారు. దీంతో ప్రజలు కొనుగోలు చేసి ఇళ్లకు తీసుకెళ్తున్నారు. కాగా వీటిలో విటమిన్స్‌, ఖనిజ లవణాలు మెండుగా ఉండి రోగ నిరోధక శక్తిని పెంచుతాయని వైద్యులు తెలుపుతున్నారు. అలాగే శరీరంలోని వేడిని తగ్గించడంతో పాటు.. హానికర వ్యర్థాలను తొలగిస్తాయి. దీంతో ప్రజలు ఒక్కో దానికి రూ.5చెల్లించి కొనుగోలు చేస్తున్నారు. – మహబూబాబాద్‌ అర్బన్‌