T20 WC 2024: ఇంగ్లండ్‌ను చిత్తు చేసిన ఆస్ట్రేలియా..

టీ20 వరల్డ్‌కప్‌-2024లో ఆస్ట్రేలియా తమ జోరును కొనసాగిస్తోంది. ఈ మెగా టోర్నీలో భాగంగా బార్బోడస్‌ వేదికగా ఇంగ్లండ్‌తో జరిగిన మ్యాచ్‌లో 36 పరుగుల తేడాతో ఆసీస్‌ ఘన విజయం సాధించింది. 

తొలుత బ్యాటింగ్‌ చేసిన ఆస్ట్రేలియా నిర్ణీత 20 ఓవర్లలో 7 వికెట్ల నష్టానికి 201 పరుగుల భారీ స్కోర్‌ సాధించింది. ఆసీస్‌ టాపార్డర్ బ్యాటర్లు అద్బుతమైన ఇన్నింగ్స్‌ ఆడారు.

ట్రావిస్‌ హెడ్‌(34), వార్నర్‌(39), మిచెల్‌ మార్ష్‌(35), మాక్స్‌వెల్‌(28), స్టోయినిష్‌(30) పరుగులతో రాణించారు. ఇంగ్లండ్‌ బౌలర్లలో క్రిస్‌ జోర్డాన్‌ రెండు వికెట్లు పడగొట్టగా.. మొయిన్‌ అలీ,అర్చర్‌, లివింగ్‌ స్టోన్‌, రషీద్ తలా వికెట్‌ సాధించారు.

రాణించిన ఆసీస్‌ బౌలర్లు..
202 పరుగుల భారీ లక్ష్యంతో బరిలోకి దిగిన ఇంగ్లండ్‌.. నిర్ణీత 20 ఓవర్లలో 6 వికెట్ల నష్టానికి 165 పరుగులు మాత్రమే చేయగల్గింది. ఇంగ్లండ్‌ బ్యాటర్లలో కెప్టెన్‌ జోస్‌ బట్లర్‌(42) టాప్‌ స్కోరర్‌గా నిలవగా.. ఫిల్‌ సాల్ట్‌(37), మొయిన్‌ అలీ(25) తమ వంతు ప్రయత్నం చేశారు. 

ఆసీస్‌ బౌలర్లలో పాట్‌ కమ్మిన్స్‌, జంపా తలా రెండు వికెట్లు సాధించగా.. హాజిల్‌వుడ్‌, మార్కస్‌ స్టోయినిష్‌ తలా వికెట్‌ పడగొట్టారు. కాగా ఆసీస్‌కు ఇది వరుసగా రెండో విజయం కావడం గమనార్హం.