TV
టీ20 వరల్డ్‌కప్‌ 2024 గ్రూప్‌-డిలో భాగంగా ఇవాళ (జూన్‌ 3) శ్రీలంక, సౌతాఫ్రికా జట్లు తలపడుతున్నాయి. న్యూయార్క్‌ వేదికగా జరుగుతున్న ఈ మ్యాచ్‌లో శ్రీలంక టాస్‌ గెలిచి తొలుత బ్యాటింగ్‌ ఎంచుకుంది. పిచ్‌ బ్యాటింగ్‌కు అనుకూలిస్తుందనే అంచనాతో తొలుత బ్యాటింగ్‌ను ఎంచుకున్నట్లు లంక కెప్టెన్‌ హసరంగ టాస్‌ సందర్భంగా చెప్పాడు.
అయితే ఈ విషయంలో హసరంగ అంచనాలు తారుమారయ్యాయి. సౌతాఫ్రికా బౌలర్ల ధాటికి లంక ఇన్నింగ్స్‌ పేకమేడలా కూలింది. 45 పరుగులకే 6 వికెట్లు కోల్పోయిన శ్రీలంక పీకల్లోతు కష్టాల్లో కూరుకుపోయింది.
తొలుత ఓట్నీల్‌ బార్ట్‌మన్‌ (2-1-3-1), ఆతర్వాత కేశవ్‌ మహారాజ్‌ (4-0-22-2), అన్రిచ్‌ నోర్జే (3-0-6-3) లంకేయులకు దారుణంగా దెబ్బ తీశారు. నిస్సంక (3), కుశాల్‌ మెండిస్‌ (19), కమిందు మెండిస్‌ (11), హసరంగ (0), సమరవిక్రమ (0), అసలంక (6) దారుణంగా విఫలం కాగా.. ఏంజెలో మాథ్యూస్‌ (9), దసున్‌ షనక (9) లంకను మూడంకెల స్కోర్‌ దాటించేందుకు ప్రయత్నిస్తున్నారు. 14 ఓవర్ల తర్వాత లంక స్కోర్‌ 61/6గా ఉంది.
ఇదిలా ఉంటే, ఈ మ్యాచ్‌లో శ్రీలంక ఓ చెత్త రికార్డు సమం చేసింది. టీ20 వరల్డ్‌కప్‌ పవర్‌ ప్లేల్లో (తొలి 6 ఓవర్లు) తమ అత్యల్ప స్కోర్‌ను సమం చేసింది. ఈ మ్యాచ్‌ పవర్‌ ప్లేలో శ్రీలంక వికెట్‌ నష్టానికి 24 పరుగులు చేసింది. 2022 ప్రపంచకప్‌లో న్యూజిలాండ్‌తో జరిగిన మ్యాచ్‌లోనూ శ్రీలంక 24 పరుగులకే పరిమితమైంది. అయితే మ్యాచ్‌లో శ్రీలంక ఏకంగా నాలుగు వికెట్లు కోల్పోయింది. టీ20 ప్రపంచకప్‌ పవర్‌ ప్లేల్లో శ్రీలంక మూడో అత్యల్ప స్కోర్‌ 2007లో నమోదైంది. కేప్‌టౌన్‌ వేదికగా ఆసీస్‌తో జరిగిన మ్యాచ్‌లో లంకేయులు 4 వికెట్ల నష్టానికి 26 పరుగులు చేశారు.
Comments
Please login to add a commentAdd a comment