TV
క్రికెట్‌లో సాధారణంగా ఫాస్ట్‌ బౌలర్లు యార్కర్లు వేయడం మనం చూస్తుంటాం. అదే ఓ స్పిన్నర్‌ యార్కర్‌ వేస్తే ఎలా ఉంటుందో తెలియాలంటే ఈ వీడియో చూడండి. వెస్టిండీస్‌, ఇంగ్లండ్‌ మధ్య తాజాగా జరిగిన టీ20 మ్యాచ్‌లో ఓ రైట్‌ ఆర్మ్‌ ఆఫ్‌ స్పిన్‌ బౌలర్‌ అద్భుతమైన యార్కర్‌ను సంధించాడు. స్పిన్నర్‌ నుంచి అనూహ్యంగా యార్కర్‌ లెంగ్త్‌ బాల్‌ రావడంతో బ్యాటర్‌ చేసేదేమీ లేక నిశ్చేష్టుడిగా మిగిలిపోయాడు.
AN OFF SPINNER WITH A YORKER. 🤯
- Dan Mousley bamboozled Rovman Powell. 🔥 pic.twitter.com/UnFQHjOsmG— Mufaddal Vohra (@mufaddal_vohra) November 11, 2024
పూర్తి వివరాల్లోకి వెళితే.. ఇంగ్లండ్‌తో జరిగిన రెండో టీ20లో వెస్టిండీస్‌ తొలుత బ్యాటింగ్‌ చేసింది. ఆ జట్టు బ్యాటర్‌ రోవ్‌మన్‌ పావెల్‌ 40 బంతుల్లో 2 ఫోర్లు, 2 సిక్సర్ల సాయంతో 43 పరుగులు చేసి జోరు మీదున్నాడు. ఈ దశలో ఇంగ్లండ్‌ రైట్‌ ఆర్మ్‌ ఆఫ్‌ స్పిన్నర్‌ డాన్‌ మౌస్లీ కళ్లు చెదిరే యార్కర్‌తో రోవ్‌మన్‌ పావెల్‌ను క్లీన్‌ బౌల్డ్‌ చేశాడు. మౌస్లీ సంధించిన యార్కర్‌ లెంగ్త్‌ బంతికి రోవ్‌మన్‌ దగ్గర సమాధానం లేదు. ఈ ఘటనకు సంబంధించిన వీడియో సోషల్‌మీడియాలో వైరలవుతుంది.
కాగా, వెస్టిండీస్‌, ఇంగ్లండ్‌ మధ్య నిన్న (నవంబర్‌ 10) జరిగిన రెండో టీ20లో ఇంగ్లండ్‌ 7 వికెట్ల తేడాతో ఘన విజయం సాధించింది. ఈ మ్యాచ్‌లో తొలుత బ్యాటింగ్‌ చేసిన విండీస్‌ నిర్ణీత 20 ఓవర్లలో 8 వికెట్ల నష్టానికి 158 పరుగులు చేసింది. రోవ్‌మన్‌ పావెల్‌ (43) ఓ మోస్తరు స్కోర్‌ చేయగా.. రొమారియో షెపర్డ్‌ (22), నికోలస్‌ పూరన్‌ (14), రోస్టన్‌ ఛేజ్‌ (13), మాథ్యూ ఫోర్డ్‌ (13 నాటౌట్‌) రెండంకెల స్కోర్లు చేశారు. ఇంగ్లండ్‌ బౌలర్లలో మౌస్లీ, లివింగ్‌స్టోన్‌, సకీబ్‌ మహమూద్‌ తలో 2 వికెట్లు పడగొట్టగా.. జోఫ్రా ఆర్చర్‌, ఆదిల్‌ రషీద్‌ చెరో వికెట్‌ దక్కించుకున్నారు.
అనంతరం 159 పరుగుల లక్ష్యాన్ని ఛేదించేందుకు బరిలోకి దిగిన ఇంగ్లండ్‌.. జోస్‌ బట్లర్‌ (45 బంతుల్లో 83; 8 ఫోర్లు, 6 సిక్సర్లు) వీరవిహారం చేయడంతో 14.5 ఓవర్లలోనే విజయతీరాలకు చేరింది. బట్లర్‌కు జతగా విల్‌ జాక్స్‌ (29 బంతుల్లో 38), లివింగ్‌స్టోన్‌ (11 బంతుల్లో 23 నాటౌట్‌) రాణించారు. ఇంగ్లండ్‌ ఇన్నింగ్స్‌లో ఫిల్‌ సాల్ట్‌ డకౌట్‌ కాగా.. జేకబ్‌ బేతెల్‌ 3 పరుగులతో అజేయంగా నిలిచాడు. ఈ గెలుపుతో ఇంగ్లండ్‌ ఐదు మ్యాచ్‌ల టీ20 సిరీస్‌లో 2-0 ఆధిక్యంలో వెళ్లింది.
Comments
Please login to add a commentAdd a comment