ఆంధ్రప్రదేశ్ రాష్ట్రానికి ప్రత్యేక హోదా ఇచ్చే విషయం తప్ప అన్నింటినీ కేంద్ర ఆర్థిక మంత్రి అరుణ్ జైట్లీ తన ప్రసంగంలో ప్రస్తావించారు. రాష్ట్రానికి ఇవ్వాల్సిన దాని కంటే చాలా ఎక్కువ మొత్తంలో నిధులు ఇస్తున్నామని, పోలవరం లాంటి ప్రాజెక్టులకు నిధులు ఇస్తూనే ఉంటామని, విభజన చట్టంలో పేర్కొన్న అన్నింటినీ అమలు చేస్తున్నామని, ఇప్పటికే చాలా సంస్థలను ఏర్పాటు చేశామని చెప్పారు. రాష్ట్రానికి ప్రత్యేక హోదా కోసం రాజ్యసభలో కాంగ్రెస్ సభ్యుడు కేవీపీ రామచంద్రరావు ప్రవేశపెట్టిన ప్రైవేటు బిల్లుపై రెండు రోజుల చర్చ అనంతరం అరుణ్ జైట్లీ సమాధానం ఇచ్చారు. కానీ జైట్లీ సమాధానంతో తాము అసంతృప్తి చెందామన్న దిగ్విజయ్ సింగ్.. తమ పార్టీ సభ్యులు వాకౌట్ చేస్తున్నట్లు ప్రకటించారు. చివరకు ఈ బిల్లుపై ఓటింగ్ లేకుండానే చర్చను ముగించారు.