ఆదిలాబాద్ @గజగజ

సాక్షి, హైదరాబాద్‌: తెలంగాణ చలికి గజగజలాడుతోంది. రాత్రి ఉష్ణోగ్రతలు పడిపోతున్నాయి. సాధారణం కంటే 8 డిగ్రీల వరకు తగ్గుతుండటంతో జనం వణికిపోతున్నారు. సాయంత్రం ఆరు దాటిందంటే చాలు చలి తీవ్రతతో జనం ఇబ్బందులు పడుతున్నారు. గత 24 గంటల్లో ఆదిలాబాద్‌లో మళ్లీ 4 డిగ్రీల రాత్రి ఉష్ణోగ్రత నమోదైంది. భద్రాచలం, ఖమ్మంలోనూ 9 డిగ్రీల చొప్పున రాత్రి ఉష్ణోగ్రతలు నమోదయ్యాయి. మెదక్‌లో సాధారణం కంటే ఐదు డిగ్రీలు తక్కువగా 9 డిగ్రీల కనిష్ట ఉష్ణోగ్రత నమోదైంది. రామగుండంలో 10, హైదరాబాద్, హన్మకొండల్లో 11 డిగ్రీలు, నిజామాబాద్‌లో 12, నల్లగొండలో 14, హకీంపేట, మహబూబ్‌నగర్‌లలో 15 డిగ్రీల చొప్పున రాత్రి ఉష్ణోగ్రతలు రికార్డు అయ్యాయని హైదరాబాద్‌ వాతావరణ కేంద్రం వెల్లడించింది.