బరి తెగించారు

అమలాపురం, న్యూస్‌లైన్ :పందెం కోళ్లు కదనరంగంలో కత్తులు దూశాయి. లక్షల రూపాయలు క్షణాల్లో పందెంరాయుళ్ల చేతులు మారాయి. ఓడినవారు ఓడుతుండగా, కొత్తవారు వచ్చి చేరారు. వందల మంది పందెంరాయుళ్లు.. వేలమంది వీక్షకులతో జిల్లా నలుమూలలా సంక్రాంతి సందర్భంగా కోడిపందాలు జరుగుతున్న ప్రాంతాలు తిరునాళ్లను తలపించాయి. ఆయా ప్రాంతాల్లో నాలుగైదు బరులు ఏర్పాటు చేసి, చుట్టూ బారికేడ్లు, టెంట్లు వేసి మరీ పందాలు నిర్వహిస్తున్నారు. కోనసీమ, మెట్ట, ఏజెన్సీ అనే తేడా లేకుండా జిల్లావ్యాప్తంగా కోడిపందాలు యథేచ్ఛగా నిర్వహిస్తున్నారు. వీటికి పారిశ్రామికవేత్తలు,భూస్వాములు, రాజకీయ నాయకులు అధిక సంఖ్యలో తరలివచ్చారు. ఒకవైపు పందాలు నిర్వహించే ప్రాంతాలు పెరగడం, నేతల అండదండలు పుష్కలంగా ఉండడంతో కనుమతోపాటు  ముక్కనుమనాడు కూడా పందాలు నిర్వహించనున్నారు. దీంతో ఈ ఏడాది పందాలు రికార్డు స్థాయిలో జరిగే అవకాశం కనిపిస్తోంది.