మున్సిపల్ 2014

శ్రీకాకుళం, న్యూస్‌లైన్: జిల్లాలో మున్సిపల్ బరిలో నిలవాలనుకున్న అభ్యర్థులు ముహూర్తాలు కోసం వేచిచూస్తున్నారు. సోమవారం నుంచి నామినేషన్లు ప్రక్రియ ప్రారంభం కాగా, తొలిరోజున పలాస మున్సిపాలిటీలోని 22వ వార్డుకు ఒక నామినేషన్ మాత్రమే దాఖలైంది. మంగళ, బుధవారాల్లో దశమి, ఏకాదశి కావడంతో ఈ రెండు రోజులు పెద్ద ఎత్తున నామినేషన్లు దాఖలయ్యే అవకాశాలు ఉన్నాయి. బరిలో నిలవాలనుకున్న అభ్యర్థులు ఇప్పటికే ముహూర్తాలు పెట్టించడంలో నిమగ్నమయ్యారు. ప్రధాన పార్టీల తరఫున పోటీ చేయాలనుకుంటున్న అభ్యర్థులు ఆయా పార్టీల అధిష్టానం గ్రీన్‌సిగ్నల్ కోసం ఎదురుచూస్తూ మరోపక్క మంచి ముహూర్తం కోసం కూడా ఆరాలు తీస్తున్నారు. జిల్లాలో ఇచ్ఛాపురం, పలాస, ఆమదాలవలస మున్సిపాలిటీలతో పాటు, పాలకొండ నగర పంచాయతీకి ఎన్నికలు జరగనున్నాయి. ఇచ్ఛాపురంలో 23, పలాసలో 25, ఆమదాలవలసలో 23, పాలకొండలో 20 వార్డులు ఉన్నాయి. నామినేషన్ దాఖలకు ఈనెల 14 వరకు గడువు ఉంది. నామినేషన్లు ఉపసంహరణకు ఈనెల 18 మధ్యాహ్నం 3 గంటల వరకు సమయం ఉంది. 13, 14 తేదీల్లో కంటే 11, 12 తేదీల్లో నామినేషన్లు దాఖలు చేసేం దుకు మంచిదని పంచాంగకర్తలు చెబుతున్నారు.