సోనియా, దిగ్విజయ్ సింగ్ దిష్టిబొమ్మల దహనం

 శ్రీకాకుళం సిటీ, న్యూస్‌లైన్ :  రాష్ట్ర విభజనకు వ్యతిరేకంగా స్థానిక జిల్లా పరిషత్ కార్యాలయం ఎదురుగా సోనియా గాంధీ, దిగ్విజయ్ సింగ్ దిష్టిబొమ్మలను ఉద్యోగులు దహనం చేశారు.  జెడ్పీ కార్యాలయంలో ఉద్యోగులు గురువారం విధులు బహిష్కరించి పీఆర్ ఉద్యోగుల సంఘం ఆధ్వర్యంలో జెడ్పీ ఎదురుగా నిరసన, ఆందోళన కార్యక్రమాలు చేపట్టారు. ఈ సందర్భంగా పీఆర్ ఉద్యోగుల సంఘ అధ్యక్షుడు కిలారి నారాయణ రావు మాట్లాడుతూ ప్రజల మనోభావాలకు సంబంధం లేకుండా ఈ రాష్ట్రంతో సంబంధం లేని వ్యక్తులు, సొంత రాష్ట్రాల్లో పత్తాలేని నేతల నిర్ణయాలే ముఖ్యమా అని ప్రశ్నించారు. వారి నిర్ణయాలే ముఖ్యమైతే సీమాంధ్ర కేంద్ర మంత్రులు ఏం చేస్తున్నారని ఆగ్రహం వ్యక్తం చేశారు. ఈ సందర్భంగా సోనియా డౌన్ డౌన్ అంటూ ఆందోళనకారులు నినాదాలు చేశారు. కార్యక్రమంలో ఉద్యోగ సంఘ నేతలు, సమైక్య పరిరక్షణ సంఘ నేతలు కె.శోభారాణి, ధర్మాన సుందరరావు, రామారావు, వినయ్, లక్ష్మణరావు, త్రినాథ రావు, కిరణ్ కుమార్, లక్ష్మీనారాయణ, రవికృష్ణ, వెంకటేశ్వర్లు, అప్పారావు, రామేశ్వరరావు తదితరులు పాల్గొన్నారు.