వ్యసనంగా మారిన క్రికెట్ బెట్టింగ్

పల్లెలకూ పాకిన ఆన్‌లైన్ జూదం
తీవ్రంగా నష్టపోతున్న యువతరం
బుకీల మూలాలను గుర్తించలేకపోతున్న పోలీసులు
 
సాక్షి, గుంటూరు: క్రికెట్ బెట్టింగ్ జిల్లాలోని యువకులను ఆర్థికంగా దెబ్బతీస్తొంది. ఆట గురించి కనీస పరిజ్ఞానం లేని యువతరం కూడా ఈ వ్యసనానికి బానిసై కుదేలవుతోంది. ఎక్కడో ముంబై, కోల్‌కతా, ఢిల్లీ వంటి మహానగరాల్లో ఉండే బుకీలు ఆన్‌లైన్ ద్వారా అన్ని రాష్ట్రాల్లో  ఏజెంట్ల వ్యవస్థను ఏర్పాటు చేసుకుని బెట్టింగ్ నిర్వహిస్తున్నారు.  ప్రస్తుతం ఈ వ్యసనం గ్రామీణ ప్రాంతాలకు సైతం పాకడంతో, దీనికి బానిసలైన యువత భవిత ప్రశ్నార్థకంగా మారుతోంది. బెట్టింగ్ ఏజెంట్లు, పందాలు కాసే యువతలో క్రికెట్ అంటే తెలిసిన వారు చాలా తక్కువ మంది ఉన్నారంటే పరిస్థితి ఎంత దారుణంగా ఉందో అర్థం చేసుకోవచ్చు.
 
* బెట్టింగ్‌లు కాసేవారిలో బడా వ్యాపారుల కుమారులే కాకుండా కంపెనీలు, షాపుల్లో గుమస్తాలుగా పనిచేస్తున్న యువకులు, విద్యార్థులు సైతం పాల్గొంటూ ఆర్థికంగా దెబ్బతింటున్నారు.
* విజయవాడ, ఒంగోలు, నెల్లూరు, తిరుపతి, విశాఖపట్నం వంటి నగరాలతో పాటు గుంటూరు జిల్లాలోని గుంటూరు, నరసరావుపేట, మాచర్ల, పిడుగురాళ్ల, సత్తెనపల్లి, కారంపూడి, చిలకలూరిపేట తదితర ప్రాంతాల్లో బెట్టింగ్ జోరుగా సాగుతోంది.
* ఈ వ్యసనం బారినపడి ఎంతో మంది యువకులు తీవ్రంగా నష్టపోతున్నారు.
 బెట్టింగ్ కొనసాగేదిలా....
* పట్టణ, మండల కేంద్రాల్లో బెట్టింగ్‌లు నిర్వహించే బుకీల ఏజెంట్లు ఆ ప్రాంతంలోని పోలీసు అధికారులకు నెలవారీ మామూళ్లు చెల్లిస్తూ రక్షణ కల్పించుకుంటారు.
* మ్యాచ్ సమయంలో ఓ గదిలో ల్యాప్‌టాప్ ద్వారా ఆన్‌లైన్‌లో ఢిల్లీ, కోల్‌కతా వంటి మహానగరాల్లో ఉండే బుకీలను సంప్రదిస్తారు. మ్యాచ్ అయిపోయేంత వరకు రన్నింగ్ కామెంటరీలాగా ప్రతిక్షణం బెట్టింగ్ రేట్లు ఎలా ఉన్నాయో ఓ సెల్‌ఫోన్ ద్వారా కనుక్కుంటారు. పక్కన మరో పది సెల్‌ఫోన్ల వరకు పక్కన పెట్టుకొని బెట్టింగ్‌లు నిర్వహించే వారితో మాట్లాడుతూ బెట్టింగ్ రేట్లు ఎలా ఉన్నాయో తెలియజేస్తూ పందాలను ఎప్పటి కప్పుడు వారి పేరుపై నమోదు చేస్తూ ఉంటారు.
* మ్యాచ్ అయిన మరుసటి రోజే డబ్బు తమకు రావాల్సిన వారి వద్దకు మనిషిని పంపుతారు. తాము ఇవ్వాల్సిన వారికి కూడా డబ్బు కచ్చితంగా ఇస్తూ నమ్మకంగా వ్యాపారంగా చేస్తుంటారు.
* ఎవరైనా డబ్బు చెల్లించలేకపోతే బెదిరింపులకు దిగుతుంటారు. బుకీలు ఏజెంట్లకు డబ్బు ఇవ్వాలన్నా.. తమకు రావాలన్నా ఆయా ప్రాంతాల్లోనే  హవాలా ద్వారా ఎక్కడికక్కడే సమకూరుస్తున్నారంటే పరిస్థితి ఏ స్థాయిలో ఉందో అర్థం చేసుకోవచ్చు.
* ఆన్‌లైన్ ద్వారా ఏజెంట్లను ఏర్పాటు చేసుకుని  బెట్టింగ్ దందాను నడుపుతున్న బుకీల మూలాలను కనుగొనలేని పోలీసులు,  బ్రోకర్ ఆఫీసులు, టీస్టాల్స్, రెస్టారెంట్లలో చిన్న చిన్న బెట్టింగ్‌లు నిర్వహించే యువకులపై కేసులు నమోదు చేసి చేతులు దులుపుకుంటున్నారు.