అగ్ని ప్రమాదంలో నలుగురు కుటుంబసభ్యుల మృతి

అగ్ని ప్రమాదంలో చనిపోయిన దంపతులు(పాత చిత్రం), వీరి పిల్లలు కూడా చనిపోయారు

న్యూఢిల్లీ : వాయివ్య ఢిల్లీలోని కోహాట్‌ ఎన్‌క్లేవ్‌లోని నాలుగంతస్తుల భవనంలో శుక్రవారం అగ్నిప్రమాదం జరిగింది. ఈ ఘటనలో ఒకే కుటుంబానికి చెందిన నలుగురు మృత్యువాతపడ్డారు. వీరంతా ఆ భవనంలో మొదటి అంతస్తులో నివసిస్తున్నారు.  శుక్రవారం వేకువజామున 3 గంటల సమయంలో ప్రమాదం జరిగినట్లు తెలుస్తోంది. ప్రమాద సమయంలో వీరంతా వారి ఫ్లాట్‌లో నిద్రపోతున్నారు.

షార్ట్‌ సర్క్యూట్‌ కారణంగా మంటలు చెలరేగి గది మొత్తం పొగ కమ్ముకోవడంతో ఊపిరాడక చనిపోయి ఉంటారని పోలీసులు భావిస్తున్నారు. చనిపోయిన వారిలో ఇద్దరు పిల్లలు కూడా ఉన్నారు. అగ్నిమాపక సిబ్బంది సంఘటనాస్థలానికి సుమారు 4 గంటల సమయానికి చేరుకుని మంటలను ఆర్పివేశారు. అప్పటికే వారు మృతిచెందినట్లు తెలిసింది.