పోలీసుల అదుపులో ముగ్గురు మావోయిస్టులు!

వరంగల్ : వరంగల్ జిల్లాలో భారీ ఎన్కౌంటర్ ఘటన మరవక ముందే...మరో ముగ్గురు మావోయిస్టులను పోలీసులు అదుపులోకి తీసుకున్నట్లు తెలుస్తోంది.  ఏటూరు నాగారం మండలం చిట్యాలలో మావోయిస్టులతో పాటు ఓ గ్రామస్తుడిని అదుపులోకి తీసుకున్నట్లు సమాచారం. 

నిన్న ఉదయం మహేశ్, కిష్టన్న, విమల్తో పాటు శేఖర్ అనే గ్రామస్తుడిని పోలీసులు అదుపులోకి తీసుకున్నారని ప్రజా సంఘాల నేతలు ఆరోపిస్తున్నారు. అదుపులోకి తీసుకున్నవారిని వెంటనే కోర్టులో హాజరు పరచాలని విరసం నేత వరవరరావు డిమాండ్ చేశారు.  మావోలకు ఎలాంటి హాని జరిగినా పోలీసులే బాధ్యత వహించాలని ఆయన స్పష్టం చేశారు. కాగా జిల్లాలో జరిగిన ఎన్ కౌంటర్ అనంతరం పోలీసులు కూంబింగ్ ముమ్మరం చేశారు. మరోవైపు జిల్లాలో ఇంకా ఉద్రిక్త వాతావరణం కొనసాగుతోంది.