మహిళపై దాడి చేసిన సర్పంచ్

కరీంనగర్(చొప్పదండి): చొప్పదండి మండలం గుమ్లాపూర్ గ్రామ సర్పంచ్ వెంకట్‌రెడ్డి అదే ఊరికి చెందిన ఓ మహిళపై దాడిచేశాడు. వివరాలు..గ్రామానికి చెందిన భూమారి భాగ్య ఇంటి పక్కనే రహదారి ఉంది. రహదారికి అవతలి వైపు ఉన్న ఓ ఇంటి ఆవిడ తన ఇంటి ముందు ఉన్న రహదారిపై బాత్రూం కట్టిస్తుండటంతో ఆమెను భాగ్య ప్రశ్నించింది. మీరు ఇలా రోడ్డు మీద కడితే నడవటానికి ఎలా వెళ్లాలి, రోడ్డు విస్తరణలో తమ ఇంటికి నష్టం వాటిల్లే ప్రమాదముందని ఆ మహిళను భాగ్య సంప్రదించింది.

అయితే నిర్మాణం చేపట్టిన మహిళ సర్పంచ్ వెంకట్ రెడ్డికి మద్ధతుదారు. ఆమెకు మద్ధతుగా వచ్చిన సర్పంచ్ వెంకట్ రెడ్డి, ఈ విషయంలో భాగ్యపై చేయి చేసుకున్నాడు. తనపై దాడి చేసి అసభ్యకరంగా ప్రవర్తించి తన బట్టలను చింపేశారంటూ బాధితురాలు పోలీసులకు ఫిర్యాదు చేసింది. పోలీసులు కేసు నమోదు చేసుకుని దర్యాప్తు చేస్తున్నారు. సర్పంచ్ పరారీలో ఉన్నాడు.