నాలుగో బెటాలియన్‌లో ఘనంగా లష్కర్‌ బోనాలు

మామునూరు : ఆషాఢమాసాన్ని పురస్కరించుకుని హన్మకొండ మండలం మామునూరు టీఎస్‌ఎస్‌పీ నాలుగో బెటాలియన్‌ ముత్యాలమ్మ దేవాలయంలో ఆదివారం సాయంత్రం లష్కర్‌ బోనాల పండుగను వైభవంగా నిర్వహించారు. ఈ సందర్భంగా ఆలయ పూజారి నారాయణమూర్తి, బెటాలియన్‌ ఇన్‌చార్జి కమాండెంట్‌ పి. శ్రీనివాస్‌కుమార్, గుడినిర్మాణ కమిటీ బాధ్యుడు గంగునాయక్‌ పర్యవేక్షణలో పోలీసు కుటుంబాలు, లక్ష్మీపురం కాలనీ మహిళలు బోనాలతో తరలివచ్చి అమ్మవారిని దర్శించుకున్నారు. తొలుత ముత్యాలమ్మకు కల్లుశాకం ఆరబోసి, కోళ్లు, మేకలు బలిచ్చి కొబ్బరికాయలు కొట్టి భక్తి శ్రద్ధలతో పూజించారు. కాగా, వేడుకల్లో చిన్నారులు, పోలీసు సిబ్బంది పోతరాజుల వేషధారణలతో అలరించారు. కార్యక్రమంలో బీజే వైఎం రాష్ట్ర అధికార ప్రతినిధి జలగం రంజిత్, టీఎస్‌ఎస్‌పీ అధికారులు, సిబ్బంది పాల్గొన్నారు.