హనీమూన్‌ల కోసమే దళితుల ఇళ్లకు

హనీమూన్‌ల కోసమే దళితుల ఇళ్లకు

రాహుల్‌పై బాబా రాందేవ్ వివాదాస్పద వ్యాఖ్యలు

 లక్నో: హనీమూన్‌లు, విహార యాత్రల కోసమే కాంగ్రెస్ ఉపాధ్యక్షుడు రాహుల్ గాంధీ దళితుల ఇళ్లకు వెళ్తుంటారని బాబా రాందేవ్ విమర్శించారు. ఓ దళిత అమ్మాయిని పెళ్లి చేసుకుని ఉంటే ఆయన అదృష్టం మరింత బాగుండేదని, ప్రధాని అయివుండేవారని శుక్రవారం వ్యాఖ్యానించారు. విదేశీ వనితను వివాహం చేసుకుంటే ప్రధాని పదవి చేజారి పోతుందని, ముందు ప్రధాని పీఠం ఎక్కిన తర్వాత విదేశీ మహిళను పెళ్లి చేసుకోవచ్చని సోనియా చెబుతుండడంతో రాహుల్ పెళ్లి చేసుకోకుండా ఉండిపోతున్నారని బాబా ఎద్దేవా చేశారు. భారతీయ వనితను చేసుకోవడం రాహుల్‌కు ఇష్టం లేదని చెప్పారు. రాహుల్ బలవంతంగా ఒంటరి జీవితం గడుపుతున్నారని ఎద్దేవా చేశారు. కాగా, తన వ్యాఖ్యలు వివాదమవుతాయని భావించిన బాబా.. దళితుల మనోభావాలు దెబ్బతింటాయని భావిస్తే తన వ్యాఖ్యలను ఉపసంహరించుకుంటానన్నారు.