TV
ఇక హిందీలో?
దక్షిణాది సినిమాలను నమ్ముకొని బాలీవుడ్‌లో మంచి హిట్స్ కొట్టాడు ప్రభుదేవా. ఏబిసిడి-2 హిట్‌తో ఊపు మీద ఉన్న ప్రభుదేవా దృష్టి ఇప్పుడు తమిళ సినిమా ‘రోమియో జూలియెట్’ మీద పడింది. ఈ సినిమాలో జయం రవి, హన్సిక హీరో,హీరోయిన్లు. దర్శక, నిర్మాతలు ‘రోమియో జూలియెట్’ను ప్రభుదేవా కోసం ప్రత్యేకంగా ప్రదర్శించారు.
ప్రభుదేవాకు సినిమా బాగా నచ్చేసిందట. తనకు బాగా నచ్చిన సినిమాలను హిందీలో రిమేక్ చేసే ప్రభుదేవా ఈ సినిమాను కూడా రిమేక్ చేసే ఆలోచనలో ఉన్నట్లు వినికిడి. ‘రోమియో జూలియెట్’ హిందీలో రిమేక్ అయితే హీరో, హీరోయిన్లు ఎవరు? అనే విషయంపై కూడా గుసగుసలు వినిపిస్తున్నాయి. హీరో ఎవరైనా... హీరోయిన్‌గా మాత్రం హన్సిక పేరే గట్టిగా వినిపిస్తుంది. ఆమెకు బాలీవుడ్‌లో నటించడం కొత్తేమీ కాదు. సినిమాలో హన్సిక పాత్ర పేరు ‘ఐశ్వర్య’ ఐశ్వర్యగా హన్సిక చలాకీగా నటించడమే కాదు... ఎమోషనల్ సీన్స్‌లో కూడా ప్రేక్షకులను మెప్పించింది. ఆమె నటనకు సినీ విమర్శకుల నుంచి కూడా మంచి ప్రశంసలు దక్కాయి. మరి ఈ లెక్కన ప్రభుదేవా హన్సికాకే ప్రథమ ప్రాధాన్యత ఇవ్వడం ఖాయంగా కనిపిస్తుంది.
