కోతులపై టీకా పరీక్ష.. సానుకూలం

లండన్‌: కరోనా వైరస్‌పై ఆక్స్‌ఫర్డ్‌ యూనివర్సిటీ పరిశోధనలో ఆశాజనకమైన ఫలితాలు కనిపించాయి. ఈ పరిశోధనలో భాగంగా  ChAdOx1 nCoV-19 అనే వ్యాక్సిన్‌ను ఆరు కరోనా బాధిత కోతులకు ఇచ్చారు. దీంతో ఆ కోతుల్లోని రోగ నిరోధక శక్తి కరోనాను అడ్డుకున్నట్లు గుర్తించారు. వ్యాక్సిన్‌ ఇచ్చిన కోతుల్లో దుష్ప్రభావాలు ఏవీ కనిపించలేదు. కరోనా వల్ల ప్రధానంగా ఊపిరితిత్తులు దెబ్బతింటాయి. కానీ, ఈ వ్యాక్సిన్‌ డోసు ఇచ్చిన కరోనా బాధిత కోతుల్లో ఊపిరితిత్తులకు ఎలాంటి హానీ జరగలేదు. ఇతర అవయవాలపైనా వైరస్‌ తీవ్రతను వ్యాక్సిన్‌ తగ్గించింది. కోతుల్లో జరిగిన పరిశోధన సానుకూల ఫలితాన్ని ఇవ్వడంతో పూర్తిస్థాయిలో వ్యాక్సిన్‌ తయారీకి ఊతం లభించినట్లేనని నిపుణులు చెబుతున్నారు.  ఈ వ్యాక్సిన్‌ మనుషుల్లో కూడా కరోనాను నిర్మూలిస్తుందని తేలితే ఈ ఏడాది చివరి కల్లా 10 మిలియన్ల డోసులు ఉత్పత్తి చేసేందుకు సిద్ధంగా ఉన్నామని ఔషధ తయారీ సంస్థ అస్ట్రాజెనికా వెల్లడించింది.