TV
చావు సీను షూటింగ్ లో చనిపోయిన నటుడు
జోర్డాన్ కి చెందిన ఒక నటుడు చావు సీనులో నటిస్తూ నటిస్తూ చనిపోయాడు. తోటి నటులందరూ 'ఈయన నటనలో జీవించేస్తున్నాడురోయ్' అనుకున్నారే కానీ ఆయన నటనలో మరణిస్తున్నాడని గుర్తించలేకపోయారు. ఒక టీవీ సీరియల్ షూటింగ్ లో ఈ సంఘటన జరిగింది.
జోర్డాన్ లో చాలా పాపులర్ టీవీ నటుడిగా పేరొందిన మహ్మూద్ అల్ సవాల్కా శుక్రవారం చావు సీను షూటింగ్ లో పాల్గొన్నాడు. చివరికి ఆ సీన్ లో ఆయన చనిపోవాలి. ఆఖరి సీన్ లో ఆయన నిజంగానే ఒరిగిపోయాడు. అందరూ అది నటనే అనుకున్నారు. కానీ కాసేపయ్యాక కానీ ఆయన ఆఖరి శ్వాస వదిలేశాడన్న విషయం వారికి అర్థం కాలేదు. దాంతో వారంతా షాక్ కి గురయ్యారు. అతని ఎదురుగా నిలుచుని ఇంకో పాత్రను పోషిస్తున్న ముంధీర్ రిహానె అనే నటుడు ఇంకా ఆ షాక్ నుంచి తేరుకోలేదు. సవాల్కా చివరి డైలాగు 'నేను చనిపోతాను. నన్ను నీ చేతుల తోనే పాతిపెట్టు.' ఆయన మరణానికి కారణం ఏమిటన్నది ఇంకా తెలియరాలేదు.
