రాంగోపాల్‌ వర్మ, మియా మాల్కోవా (ఫైల్‌ ఫొటో)

సాక్షి, ముంబై: వివాదాల దర్శకుడు రాంగోపాల్‌ వర్మ తాజాగా తీసిన ఆన్‌లైన్‌ చిత్రం ‘గాడ్‌ సెక్స్‌ ట్రూత్‌’. (జీఎస్టీ). ఈ సినిమాపై అనేక వివాదాలు ముసురుకున్నాయి. చర్చోపచర్చలు జరిగాయి. టీవీ చర్చల్లో ప్రజాసంఘాల నేతలను కించపరిచేలా మాట్లాడారంటూ వర్మపై కేసులు కూడా నమోదయ్యాయి. ఈ వివాదాలు ఎలా ఉన్నా తన జీఎస్టీ గ్రాండ్‌ సక్సెస్‌ అయిందంటున్నాడు వర్మ. ఈ సినిమాకు ఫెంటాస్టికల్లీ ఆసమ్‌ రెస్పాన్స్‌ (అద్భుతమైన స్పందన) వస్తున్నదని తాజాగా ట్వీట్‌ చేశాడు. అంతేకాదు అద్భుతమైన స్పందనకు ఉబ్బితబ్బిబ్బైపోయి.. వర్మ జీఎస్టీ-2 కూడా తీయబోతున్నాడట. ఇదే విషయాన్ని వర్మ తన ట్వీట్‌లో వెల్లడించాడు. జీఎస్టీ-2 తీయబోతున్న సందర్భంగా దేవుడు తనతో, తన జీఎస్టీ లవర్స్‌తో ఉండాలని ఆకాంక్షించాడు.

విదేశీ పోర్న్‌స్టార్‌ మియా మాల్కోవాతో తెరకెక్కించిన ఈ పెద్దల చిత్రానికి ప్రముఖ సంగీత దర్శకుడు ఎంఎం కీరవాణి నేపథ్య సంగీతం అందించారు. దేశంలో సూపర్‌హిట్‌ అయిన ‘పద్మావత్‌’, ‘టైగర్‌ జిందా హై’ సినిమాలను మించి తన జీఎస్టీ ట్రెండింగ్‌లో నంబర్‌ వన్‌ స్థానంలో ఉందని మరో ట్వీట్‌ వర్మ పేర్కొన్నారు.