స్టయిలిష్‌ ఫైటర్‌

విజయ్‌ దేవరకొండ

పూరి జగన్నాథ్‌ తన తదుపరి చిత్రం ‘ఫైటర్‌’ కోసం విజయ్‌ దేవరకొండను ఫైటర్‌లా మారుస్తున్నారు. ఈ ఫైటర్‌ను ఫీల్డ్‌లో దింపే టైమ్‌ను రెడీ చేసుకున్నారు పూరి. మార్షల్‌ ఆర్ట్స్‌ నేపథ్యంలో పూరి జగన్నాథ్‌ తెరకెక్కించనున్న చిత్రం ‘ఫైటర్‌’. హిందీ, తెలుగు భాషల్లో ఈ సినిమా తెరకెక్కనుంది. ఈ సినిమా షూటింగ్‌ను ముంబైలో ప్రారంభించనున్నారని తెలిసింది. జనవరి 13న రెగ్యులర్‌ షూటింగ్‌ ప్రారంభం కానుందట. ఎక్కువ శాతం షూటింగ్‌ ముంబైలోనే జరగనుంది.

ఈ సినిమాలో విజయ్‌ వేషధారణ, శరీరాకృతిని సరికొత్తగా డిజైన్‌ చేశారట పూరి. ప్రముఖ బాలీవుడ్‌ హెయిర్‌ స్టయిలిస్ట్‌ ఆలిమ్‌ హకీమ్‌ ఈ సినిమాకు పని చేయనున్నారు. సల్మాన్‌ ఖాన్, షాహిద్‌ కపూర్, రణ్‌బీర్‌ కపూర్‌తో పాటు ‘సాహో’లో ప్రభాస్‌కు స్టయిలింగ్‌ చేశారు ఆలిమ్‌ హకీమ్‌. ప్రస్తుతం ‘ఆర్‌ఆర్‌ఆర్‌’లో రామ్‌చరణ్‌కు స్టయిలిస్ట్‌గా చేస్తున్నారాయన. ఇప్పుడు విజయ్‌ దేవరకొండకు స్టయిలిస్ట్‌గా చేస్తున్నారు. ఈ సినిమాలో విజయ్‌ తల్లిగా రమ్యకృష్ణ నటించనున్నారు. ప్యాన్‌ ఇండియా సినిమాగా రిలీజ్‌ కానున్న ఈ సినిమాను పూరి, ఛార్మీ నిర్మిస్తారు.