విలియమ్సన్‌ అరుదైన ఘనత

పుణె: ఇండియన్‌ ప్రీమియర్‌ లీగ్‌(ఐపీఎల్‌) తాజా సీజన్‌లో సన్‌రైజర్స్‌ హైదరాబాద్‌ కెప్టెన్‌ కేన్‌ విలియమ్సన్‌ అరుదైన ఘనత సాధించాడు. ఆదివారం చెన్నై సూపర్‌ కింగ్స్‌తో మ్యాచ్‌లో  విలియమ్సన్‌ హాఫ్‌ సెంచరీ సాధించాడు. దాంతో ఈ సీజన్‌లో వరుసగా నాల్గో హాఫ్‌ సెంచరీ విలియమ్సన్‌ ఖాతాలో వేసుకున్నాడు. ఫలితంగా ప‍్రస్తుత ఐపీఎల్‌లో వరుసగా నాలుగు హాఫ్‌ సెంచరీలు సాధించిన ఆటగాళ్ల జాబితాలో జోస్‌ బట్లర్‌(రాజస్తాన్‌ రాయల్స్‌)కలిసి సంయుక్తంగా అగ్రస్థానంలో నిలిచాడు. ఈ ఐపీఎల్‌లో విలియమ‍్సన్‌కు ఏడో హాఫ్‌ సెంచరీ కాగా, ఓవరాల్‌గా 10వ ఐపీఎల్‌ అర్థ శతకం.

టాస్‌ ఓడి తొలుత బ్యాటింగ్‌ చేపట్టిన సన్‌రైజర్స్‌కు ఆదిలోనే ఎదురుదెబ్బ తగిలింది. ఓపెనర్‌ అలెక్స్‌ హేల్స్‌(2) తొలి వికెట్‌గా పెవిలియన్‌ చేరాడు. ఆ తరుణంలో శిఖర్‌ ధావన్‌తో కలిసి కేన్‌ విలియమ‍్సన్‌ ఇన్నింగ్స్‌ నిర్మించాడు.  వీరిద్దరూ కలిసి రెండో వికెట్‌కు 123 పరుగుల భాగస్వామ్యాన్ని సాధించారు. ఈ క్రమంలోనే ముందుగా ధావన్‌ హాఫ్‌ సెంచరీ సాధించగా, ఆపై విలియమ్సన్‌ అర్థ శతకం నమోదు చేశాడు. అయితే జట్టు స్కోరు 141 పరుగుల వద్ద ఉండగా ధావన్‌(79;49 బంతుల్లో 10 ఫోర్లు, 3 సిక్సర్లు), విలియమ్సన్‌(51; 39 బంతుల్లో 5 ఫోర్లు, 2 సిక్సర్లు)లు వరుసగా పెవిలియన్‌ చేరారు. ముందుగా డ్వేన్‌ బ్రేవో వేసిన16 ఓవర్‌ చివరి బంతికి ధావన్‌ ఔట్‌ కాగా, ఆపై శార్దూల్‌ ఠాకూర్‌ వేసిన 17 ఓవర్‌ తొలి బంతికి విలియమ్సన్‌ పెవిలియన్‌ చేరాడు