వెంటనే చర్య తీసుకోండి

న్యూఢిల్లీ: నగరంలో ఉంటున్న ఈశాన్య భారతీయులకు బీజేపీ సంఘీభావం ప్రకటించింది. అరుణాచల్ ప్రదేశ్‌కు చెందిన 19 యేళ్ల యువకుడిపై దాడి చేసిన ఇద్దరిపై వెంటనే చర్య తీసుకోవాలని ఆ పార్టీ డిమాండ్ చేసింది. ఈ విషయమై రాజ్‌ఘాట్ బయ ట ఆదివారం నిర్వహించిన ఆందోళనలో పార్టీ ఢిల్లీ ప్రదేశ్ అధ్యక్షుడు విజయ్ గోయల్ పాల్గొన్నారు. ఈ సందర్భంగా ఆయన మాట్లాడుతూ... ‘ఇటువంటి ఘటనలు జరగడం దురదృష్టకరం. ఈశాన్యవాసులకు భారతీయ జనతా పార్టీ అండగా ఉంటుంది. గతంలో కూడా నగరంలో ఈశాన్యరాష్ట్రాల ప్రజలపై దాడులు కొనసాగాయి. వారిని వేధించిన ఘటనలు వెలుగుచూశాయి. ఇవి ఇంతటితోనే ఆగిపోవాలి. నిడో తానియాపై బుధవారం జరిగిన దాడిని రాష్ట్ర ప్రభుత్వం తీవ్రంగా పరిగణించాలి. కారకులపై వెంటనే చర్యలకు ఆదేశించాల’న్నారు.