13 శాతం పెరిగిన బజాజ్ ఆటో నికరలాభం

న్యూఢిల్లీ: ప్రస్తుత ఆర్థిక సంవత్సరం ద్వితీయ త్రైమాసికంలో బజాజ్ ఆటో లిమిటెడ్ నికరలాభంలో 13 శాతం వృద్ధిని నమోదు చేసింది. గత సంవత్సరం ఇదే కాలంలో రూ.741 కోట్లుగా ఉన్న నికర లాభం ఈ ఏడాది రూ.837 కోట్లకు పెరిగింది. రూపాయి మారకం విలువ క్షీణించడంతో ఎగుమతులు పెరిగాయని, దీంతో లాభాలు పెరిగినట్లు కంపెనీ బుధవారం విడుదల చేసిన ప్రకటనలో పేర్కొంది. ఈ సమీక్షా కాలంలో అమ్మకాలు 5 శాతం పెరిగి రూ.4,817 కోట్ల నుంచి రూ.5,061 కోట్లకు చేరాయి. అదే వాహనాల పరంగా చూస్తే అమ్మకాలు 8 శాతం క్షీణించి 10,49,208 వాహనాల నుంచి 9,61,330 వాహనాలకు పడిపోయాయి. మొత్తం ఆదాయంలో 40 శాతం వాటా కలిగి వున్న ఎగుమతులు మాత్రం 26 శాతం వృద్ధితో రూ.1,686 కోట్ల నుంచి రూ.2,125 కోట్లకు చేరుకున్నాయి.