‘కుట్రదారులను బయటకు లాగుతాం’

‘కుట్రదారులను బయటకు లాగుతాం’

కోజికోడ్‌: మళయాల నటి అపహరణ, దాడి వెనుకున్న వారందరినీ పట్టుకుంటామని కేరళ ప్రభుత్వం ప్రకటించింది. ఈ ఘటన వెనుక గూండాలతో పాటు సినిమా పరిశ్రమకు చెందిన వ్యక్తుల ప్రమేయం ఉండొచ్చని రాష్ట్ర సాంస్కృతిక శాఖ మంత్రి ఏకే బాలన్‌ ఆరోపించారు. ‘ నిందితుల ద్వారా ఈ దాడి వెనుక ఎవరున్నారో కనుక్కుంటాం. దర్యాప్తు కేవలం కిరాయి గూండాలకు మాత్రమే పరిమితం కాదు. కుట్రదారులను అందరినీ బయటకు లాగుతామ’ని బాలన్ పేర్కొన్నారు.

మరోవైపు ఈ కేసులో దర్యాప్తును పోలీసులు ముమ్మరం చేశారు. ఆరుగురు నిందితులను అరెస్ట్ చేశారు. ప్రధాన నిందితుడు సునీల్ అలియాస్ పల్సర్‌ సుని, అతని అనచరుడు విజేశ్‌     ఇంకా పట్టుబడలేదు. వీరిని అరెస్టు చేసేందుకు పోలీసులు తీవ్రంగా ప్రయత్నిస్తున్నారు. ఈ దాడి వెనుక డబ్బులు కోసం ఘాతుకాలకు పాల్పడే ‘కొటేషన్ మాఫియా’ హస్తం ఉండొచ్చని పోలీసులు అనుమానిస్తున్నారు.