నియంత్రణలపై భయాలొద్దు

న్యూఢిల్లీ: రూపాయి పతనం కట్టడి కోసం పెట్టుబడులపై పరిమితులు విధించనున్నారన్న ఆందోళనల వల్ల శుక్రవారం స్టాక్‌మార్కెట్లు, దేశీ కరెన్సీ భారీగా పతనం కావడంతో ఆర్థిక శాఖ, ఆర్‌బీఐ అర్జంటుగా రంగంలోకి దిగాయి. ఇన్వెస్టర్లకు భరోసా కల్పించే ప్రయత్నం చేశాయి. పెట్టుబడులపై నియంత్రణ విధించే పాత విధానాలకు మళ్లే యోచనేదీ లేదని స్పష్టం చేశాయి. ‘పెట్టుబడులపై పరిమితులు విధిస్తారన్న వార్తలు వస్తున్నాయి. ఎఫ్‌ఐఐల అమ్మకాల ద్వారా కావొచ్చు..మరొకటి కావొచ్చు వ్యాపారపరమైన నిధులను విదేశాలకు తీసుకెళ్లడంపై ఎలాంటి పరిమితి విధించే ప్రసక్తే లేదు’ అని ఆర్థిక వ్యవహారాల విభాగం కార్యదర్శి అరవింద్ మాయారాం స్పష్టం చేశారు. డివిడెండ్లు, లాభాలు, రాయల్టీలు మొదలైన వాటితో పాటు సాధారణ వ్యాపార లావాదేవీలకు సంబంధించి నిధుల తరలింపును నియంత్రించే యోచనేదీ లేదని చెప్పారు. దేశీ స్టాక్ మార్కెట్లు సెంటిమెంట్లపైనే పనిచేస్తున్నట్లు కనిపిస్తోందని, ప్రస్తుత పరిస్థితులన్నీ ప్రభుత్వానికి తెలుసని మాయారాం చెప్పారు. అవసరమైన సమయాల్లో రూపాయి స్థిరంగా ఉండే పరిస్థితులను కల్పించే ఉద్దేశంతోనే చర్యలు తీసుకోవడం జరుగుతోందన్నారు. రూపాయి భారీ హెచ్చుతగ్గులకు లోనుకాకుండా చూసేందుకు అన్ని ప్రయత్నాలు చేస్తామని మాయారాం వివరించారు. అలాగని, నిర్ణీతస్థాయి దగ్గర రూపాయిని నిలువరించాలన్న ఆలోచనేదీ లేదని చెప్పారు.