శశికళ వర్గం పార్టీ పేరు ఇదే..

జయలలిత మృతి నేపథ్యంలో అన్నాడీఎంకేకు చెందిన రెండాకుల గుర్తు ఎవరికి దక్కేనో అన్న ఉత్కంఠకు తాత్కాలికంగా తెరపడింది. తమదే అసలైన అన్నాడీఎంకే పార్టీ అని, తమకే ఆ పార్టీ గుర్తును కేటాయించాలంటూ శశికళ, పన్నీర్‌ సెల్వం వర్గాలు కోరడంతో తాత్కాలికంగా ఈ గుర్తును కేంద్ర ఎన్నికల సంఘం స్తంభింపజేసింది. దివంగత సీఎం జయలలిత మృతితో ఆమె నియోజకవర్గం ఆర్కే నగర్‌ ఉప ఎన్నికల్లో కొత్త గుర్తును ఎంచుకోవాలంటూ ఇరువర్గాలకు ఈసీ సూచించింది.

ఈ నేపథ్యంలో శశికళ వర్గం కొత్త పార్టీ పేరును తెరపైకి తెచ్చింది. 'ఏఐఏడీఎంకే అమ్మ' పేరుతో ఉప ఎన్నికల్లో తాము పాల్గొంటామని శశికళ వర్గం ఈసీకి తెలిపింది.  తమ పార్టీకి ఆటో, క్యాప్‌, బ్యాట్‌లలో ఒకదానిని గుర్తుగా కేటాయించాలని శశికళ వర్గం కోరింది. దీంతో ఆ పార్టీ కొత్త పేరును ఆమోదించి.. టోపీ గుర్తును ఈసీ కేటాయించింది. ఇక పన్నీర్‌ సెల్వం వర్గం 'ఏఐఏడీఎంకే పురచ్చి తలైవీ అమ్మ' పేరుతో ఆర్కే నగర్‌ ఎన్నికలకు సిద్ధమవుతోంది. ఆ వర్గానికి 'విద్యుత్ స్తంభం' గుర్తును ఈసీ కేటాయించింది.