TV
అథిరా పటేల్‌.. బాలనటిగానే ఎంట్రీ ఇచ్చింది కానీ, కనిపించింది మాత్రం పరిణతిగల పాత్రలో! పోషించే పాత్ర ఏదైనా ప్రాణం పెట్టి నటించటం ఆమెకు అలవాటు.
అందుకే, అనతికాలంలోనే మంచినటిగా పేరుతెచ్చుకుంది. ఆమె గురించి కొన్ని విషయాలు..
అథిరా స్వస్థలం కేరళలోని కోళికోడ్‌ జిల్లా, తిరువంబాడి. తన చదువును అక్కడే పూర్తి చేసింది.
ఆమెకు చిన్నప్పటి నుంచీ సినిమాలంటే ఇష్టం. టీవీలో వచ్చే సినిమాలు చూస్తూ నటన మీద ఆసక్తి పెంచుకుంది. అలా తను ఏడవ తరగతి చదువుతున్నప్పుడే నటనారంగంలోకి అడుగుపెట్టింది.
‘అంగమలై డైరీస్‌’లో హీరోకి చెల్లెలుగా నటించి ప్రేక్షకుల ప్రశంసలు అందుకుంది.
ఆమె.. కథానాయికగా మెప్పించిన చిత్రం ‘కాంటెస్సా’. ‘ఆడు 2’, ‘విలన్‌’, ‘భూతకాలం’ వంటి పెద్ద సినిమాల్లోనూ నటించింది.
తొలిసారి ‘వుజా డె’ అనే షార్ట్‌ ఫిల్మ్‌లో నటించింది. అదే ఆమెను వెండితెరకు పరిచయం చేసింది.
‘ఇష్ఠి’ అనే సంస్కృత సినిమాలో నెడుముడి వేణుకు మూడో భార్యగా, చిన్న పాత్రలో వెండితెరపై మెరిసింది.
మోడలింగ్‌ అవకాశాలనూ అందిపుచ్చుకుంది. పలు వాణిజ్య ప్రకటనల్లో కనిపించింది.
∙ఆమె తాజా చిత్రం ‘బోగన్‌విల్లా’ సోనీ లివ్‌లో స్ట్రీమ్‌ అవుతూ, వీక్షకులను అలరిస్తోంది.
నా ఇంట్రెస్ట్‌ను గ్రహించి ఆ వైపుగా ప్రోత్సహించారు మా పేరెంట్స్‌.
అందుకే ఇప్పుడు ఇక్కడున్నాను.
నేను బడి ఎగ్గొట్టడానికి ఆడిన డ్రామాల నుంచే నా యాక్టింగ్‌ మొదలైంది (నవ్వుతూ)! : అథిరా పటేల్‌.
