‘ప్రేమకథా చిత్రమ్’ తెరకెక్కించిన జె. ప్రభాకర్ రెడ్డి స్వీయదర్శకత్వంలో కొడాలి సుబ్బారావుతో కలిసి నిర్మిస్తున్న చిత్రం ‘అనగనగా ఒక చిత్రమ్’. శివ, మేఘశ్రీ జంటగా నటిస్తున్న ఈ చిత్రం షూటింగ్ శరవేగంగా జరగుతోంది. ఇటీవల నాయకానాయికలపై విదేశాలలో పాటలను చిత్రీకరించారు. నిర్మాత మాట్లాడుతూ -‘‘అందమైన ప్రేమకథ నేపథ్యంలో ఈ చిత్రాన్ని తెరకెక్కిస్తున్నాం. జార్జియా దేశ రాజధాని టిబ్లిసి, అనామరి, స్నో, కాస్‌బెర్గ్ తదితర అందమైన ప్రదేశాల్లో చిత్రీకరించాం. వచ్చే నెలలో పాటలను విడుదల చేస్తాం’’ అని తెలిపారు. ఈ చిత్రానికి రచన: అజయ్, నిర్మాణ నిర్వహణ: నల్లూరి శ్రీనివాస్.
  


 ‘‘ఈ సినిమా టీజర్‌ను చూస్తుంటే కచ్చితంగా హిట్ అవుతుందనే నమ్మకం ఉంది’’ అని  దాసరి నారాయణరావు అన్నారు. శివ, మేఘశ్రీ జంటగా  కొడాలి సుబ్బారావు, జె.ప్రభాకర్‌రెడ్డి నిర్మిస్తున్న చిత్రం ‘అనగనగా ఒక చిత్రమ్’. జె.ప్రభాకర్‌రెడ్డి దర్శకుడు. ఈ చిత్రం టీజర్‌ను హైదరాబాద్‌లో దాసరి విడుదల చేశారు. ఈ సందర్భంగా ఆయన మాట్లాడుతూ -‘‘తక్కువ రోజుల్లో, లోబడ్జెట్‌తో ఈ చిత్రాన్ని రూపొందించడం మంచి ప్రయత్నం. మా తారకప్రభు ఫిలిమ్స్ పతాకంపై జె.ప్రభాకరరెడ్డి దర్శకత్వంలో ఓ సినిమా చేయబోతున్నాం’’ అని చెప్పారు. ఈ కార్యక్రమంలో శివ, మేఘశ్రీ, జె. ప్రభాకర్‌రెడ్డి, శాఖమూరి మల్లికార్జున రావు, నల్లూరి శ్రీనివాస్ తదితరులు పాల్గొన్నారు.
  


 ఈ కుర్రాడు చాలా ఇన్నోసెంట్. అనుకోని పరిస్థితుల్లో రెబల్‌గా మారతాడు. మరి ఆ తర్వాత ఏమైందనేది తెలియాలంటే ‘అనగనగా ఒక చిత్రమ్’ చూడాల్సిందే అంటున్నారు దర్శక నిర్మాత జె. ప్రభాకర్ రెడ్డి. శివ, మేఘశ్రీ ఇందులో హీరో హీరోయిన్లు. యూత్‌ఫుల్ ఎంటర్‌టైనర్‌గా తెరకెక్కుతున్న ఈ సినిమా 85 శాతం పూర్తయింది. ఈ సందర్భంగా దర్శకుడు మాట్లాడుతూ -‘‘చిన్న సినిమాగా మొదలు పెట్టాం. కానీ పెద్ద సినిమా అయింది. మే 4న టీజర్ విడుదల చేస్తాం. అదే నెల 31న పాటలను విడుదల చేస్తాం’’ అని తెలిపారు. ఈ సినిమాలో సీనియర్ తారలతో నటిస్తున్నందుకు చాలా ఆనందంగా ఉందని హీరో శివ అన్నారు. ఈ చిత్రానికి కథ, మాటలు: అజయ్, నిర్మాణ నిర్వహణ: నల్లూరి శ్రీనివాస్, ప్రొడక్షన్ ఎగ్జిక్యూటివ్: కొడాలి శ్రీనివాసరావు.