ఆనందకృష్ణ, స్వాతిమండల్, అశోక్, యాంకర్‌ ఇందు, వెంకటేష్‌ ముఖ్య తారలుగా కొమారి జానకీరామ్‌ దర్శకత్వంలో ఓ సినిమా తెరకెక్కుతోంది. తోలుబొమ్మల సిత్రాలు బ్యానర్‌పై కొమారి జానయ్య నాయుడు నిర్మిస్తున్న ఈ చిత్రం షూటింగ్‌ పూర్తయింది. జానకీరామ్‌ మాట్లాడుతూ– ‘‘కామెడీ, హారర్, థ్రిల్లర్‌ నేపథ్యంలో తెరకెక్కిన చిత్రమిది. మా సినిమా ప్రేక్షకులకు థ్రిల్లింగ్‌తో పాటు సందేశం ఇస్తుంది. బాచుపల్లి దగ్గర వేసిన ప్రత్యేకమైన సెట్‌లో ప్రత్యేక పాట చిత్రీకరణతో షూటింగ్‌ మొత్తం పూర్తయింది. ఈ పాట మద్యానికి బానిసైన వారికి మంచి సందేశాన్ని ఇచ్చే విధంగా ఉంటుంది. శ్రష్టి వర్మ డాన్స్‌ ఈ పాటకు ప్రత్యేక ఆకర్షణగా నిలుస్తుంది. ప్రస్తుతం పోస్ట్‌ ప్రొడక్షన్‌ పనులు జరుగుతున్నాయి’’ అన్నారు. ఈ చిత్రానికి కెమెరా: డి.యాదగిరి, సంగీతం: యు.వి.నిరంజన్‌.


 ఆనంద్‌కృష్ణ, వృశాలి జంటగా లవ్, యాక్షన్‌ కథాంశంతో తెరకెక్కిన చిత్రం ‘నీలిమలై’. సూర్యకిరణ్‌ ఇలాదిని దర్శకునిగా పరిచయం చేస్తూ నీలిమ ప్రొడక్షన్స్‌ పతాకంపై పల్లెర్ల ఆనంద్‌ నిర్మించిన ఈ చిత్రం పోస్ట్‌ ప్రొడక్షన్‌ జరుపుకుంటోంది. దర్శక–నిర్మాతలు మాట్లాడుతూ– ‘‘మానవీయ విలువల నేపథ్యంలో సాగే చిత్రమిది. చైల్డ్‌ సెంటిమెంట్‌ కూడా ఉంటుంది. ఆనంద్‌కృష్ణ, బేబీ అర్చితల మధ్య సన్నివేశాలు హృదయాన్ని తాకేలా ఉంటాయి. రీ–రికార్డింగ్‌ టైమ్‌లో మంచి సినిమా చేశారని సంగీత దర్శకుడు ‘వందేమాతరం’ శ్రీనివాస్‌ అభినందించడం మా చిత్ర విజయానికి తొలి ప్రశంస అనుకుంటున్నాం. అయ్యప్పస్వామి భక్తులకు మా చిత్రం ఒక కానుక. అన్నివర్గాల ప్రేక్షకులకూ నచ్చే వాణిజ్య అంశాలున్నాయి. అతి త్వరలో పాటలు విడుదల చేస్తాం’’ అని చెప్పారు. భానుచందర్, అలీ, సత్యప్రకాశ్, సాయికిరణ్‌ తదితరులు నటించిన ఈ చిత్రానికి కెమెరా: కిరణ్‌కుమార్, పాటలు: దేవేంద్ర, సమర్పణ: నీలిమ.