సాక్షి, హైదరాబాద్‌: రాష్ట్రంలోని 17 స్థానాల్లో ఏ పార్టీతో పొత్తు లేకుండా పోటీ చేస్తున్న తమకు లౌకికవాద పార్టీ లు మద్దతు పలకాలని కాంగ్రెస్‌ పార్టీ రాష్ట్ర వ్యవహారాల ఇన్‌చార్జి ఆర్‌.సి.కుంతియా విజ్ఞప్తి చేశారు. తెలంగాణ జనసమితి, తెలుగుదేశం, సీపీఐ, సీపీఎంలు కాంగ్రెస్‌ అభ్యర్థుల గెలుపు కోసం సహకరించాలని కోరారు. ఆదివారం గాంధీభవన్‌లో కుంతియా విలేకరులతో మాట్లాడారు. సామాజికన్యాయం కోసం తాము పోటీ చేస్తున్నామని, లౌకికవాద పార్టీలు పోటీలో లేని స్థానాల్లో కాంగ్రెస్‌ అభ్యర్థులకు మద్దతివ్వాలని కోరారు. కాంగ్రెస్‌ అధినేత రాహుల్‌గాంధీకి ఓటమి భయం పట్టుకుందన్న కేంద్రమంత్రి పీయూష్‌ గోయల్‌ వ్యాఖ్యలను తీవ్రంగా ఖండిస్తున్నామన్నారు. రాహుల్‌ నేతృత్వంలో 4 రాష్ట్రాల్లో కాంగ్రెస్‌ అధికారంలోకి రావడాన్ని చూసి మోదీకే భయం పట్టుకుందని ఎద్దేవా చేశారు. మాజీమంత్రి షబ్బీర్‌ అలీ మాట్లాడుతూ కేటీఆర్‌ అహంకారంతో మాట్లాడుతున్నారని, స్వాతంత్య్రం తెచ్చింది.. తెలంగాణ ఇచ్చింది కూడా కాంగ్రెస్‌ పార్టీయేనన్న విషయాన్ని గుర్తుంచుకోవాలని హితవు పలికారు.   కాంగ్రెస్‌ మనుగడ అగమ్యగోచరం   మాజీఎంపీ రాపోలు ఆనందభాస్కర్‌   హైదరాబాద్‌: కాంగ్రెస్‌ అధినాయకత్వంలో విచక్షణ కరువైందని, ఆ పార్టీ మనుగడ అగమ్యగోచరంగా మారిందని అందుకే పార్టీ వీడుతున్నానని మాజీ రాజ్యసభ సభ్యుడు రాపోలు ఆనంద భాస్కర్‌ అన్నారు. తాను ఏ పార్టీలో చేరతానో ఇప్పుడే చెప్పలేనన్నారు. ఆదివారం సోమాజిగూడ ప్రెస్‌క్లబ్‌లో మీడియాతో మాట్లాడుతూ 1995లో తెలంగాణ ప్రత్యేక సాధన ఉద్యమంలో తాను కీలకపాత్ర పోషించానని, తర్వాత రాజ్యసభ సభ్యునిగా ప్రత్యేక రాష్ట్ర ఆవశ్యకతను పార్లమెంట్‌లో వినిపించానన్నారు. కాంగ్రెస్‌ పార్టీలో అంతర్గత సైద్ధాంతిక వైరుధ్యం తనను కలిచివేసిందన్నారు. అందుకే తాను కాంగ్రెస్‌ లోని అధినాయకత్వంతో విభేదించాల్సిన పరి స్థితి వచ్చిందన్నారు.  సబ్బండ జాతుల ప్రయోజనం, తెలంగాణ సర్వతోముఖాభివృద్ధి, భారత జాతి సంరక్షణకోసం ప్రజలతో మమేకమయ్యేందుకు నిర్ణయించుకున్నట్లు వివరించారు.   


 సాక్షి, న్యూఢిల్లీ: ఆరెకటికలను ఎస్సీ జాబితాలో చేర్చడంతోపాటు, ఆరెకటిక కులానికి రూ.600 కోట్లతో ఫెడరేషన్‌ను ఏర్పాటు చేయాలన్న డిమాండ్లతో రాష్ట్ర ఆరెకటిక పోరాట సమితి ఆధ్వర్యంలో ఢిల్లీలోని జంతర్‌మంతర్‌లో బుధవారం ధర్నా నిర్వహించారు. ఆంధ్రప్రదేశ్‌లోని వివిధ జిల్లాల నుంచి తరలివచ్చిన ఆరెకటిక పోరాట సమితి సభ్యులు దీనిలో పాల్గొన్నారు. ఈ ధర్నాకి ఎంపీలు రాపోలు ఆనంద భాస్కర్, కోమటిరెడ్డి రాజగోపాల్‌రెడ్డి, అంజన్ కుమార్ యాదవ్, దేవేందర్‌గౌడ్ మద్దతు తెలిపారు.
 
  ఈ సంద ర్భంగా ఆరెకటిక పోరాటసమితి వ్యవస్థాపక అధ్యక్షుడు గొగికార్ సుధాకర్ మాట్లాడుతూ... దేశంలోని 18 రాష్ట్రాల్లో ఆరెకటికలు ఎస్సీ జాబితాలో ఉన్నారని, అదేవిధంగా ఆంధ్రప్రదేశ్‌లోని వారిని ఎస్సీ జాబితాలో చేర్చాలని డిమాండ్ చేశారు. తమను కసాయి కటిక అని కించపరిచే విధంగా మాట్లాడేవారిపై చట్టపరమైన చర్యలు తీసుకోవాలన్నారు. మెట్రో, రిలయన్స్ వంటి ప్రైవేటు సంస్థల నుంచి తమ వృత్తిని కాపాడాలని కోరారు. రాష్ట్రంలో 45 నుంచి 50 లక్షల మంది జనాభా కలిగిన ఆరెకటికలను ఏ రాజకీయ పార్టీ గుర్తించడం లేదని ఆవేదన వ్యక్తం చేశారు. జనాభా ప్రాతిపదికన చట్టసభల్లో పోటీచేసేలా అన్ని రాజకీయ పార్టీలు అవకాశం కల్పించాలని ఆయన కోరారు.
 
  వీరి ధర్నాకు మద్దతు తెలిపేందుకు వచ్చిన ఎంపీలు మాట్లాడుతూ.. ఆరెకటికల సమస్యలను కేంద్ర ప్రభుత్వం దృష్టికి తీసుకెళ్లి పరిష్కరించేందుకు సహకరిస్తామన్నారు. భవిష్యత్తులో చేయబోయే ఆందోళనలకు తమ మద్దతు ఉంటుందని ప్రకటించారు. ఎంపీలతోపాటు కర్ణాటకకి చెందిన ఎమ్మెల్సీ సిద్ధిరామన్న, ఢిల్లీ కార్పొరేటర్ ఊర్మిల, యూపీ, ఎంపీ, రాజస్థాన్, హర్యానా, పంజాబ్ రాష్ట్రాల్లోని ఆరెకటిక సంఘాలు మద్దతు తెలిపాయి.
  ధర్నాలో పోరాట సమితి రాష్ట్ర ప్రధాన కార్యదర్శి కల్యాణ్‌కార్ ఈశ్వర్‌చౌదరి, కాంగ్రెస్ పార్టీ జడ్చర్ల నియోజకవర్గ అధ్యక్షుడు నందీశ్వర్ తదితరులు పాల్గొన్నారు.