యాదిగిరిగుట్ట: నల్లగొండ జిల్లా యాదిగిరి గుట్టలో కొలువైన శ్రీ లక్ష్మినరసింహ స్వామిని సోమవారం తెలంగాణ డీజీపీ అనురాగ్ శర్మ దర్శించుకున్నారు. తొలిసారి పూర్తిస్థాయి డీజీపీగా బాధ్యతలు స్వీకరించిన నేపధ్యంలో ఆయన స్వామిని దర్శించుకున్నారు. ఆలయంలో ప్రత్యేక పూజలు నిర్వహించి అభిషేకంలో పాల్గొన్నారు.  కాగా, యాదగిరి గుట్టలో భక్తుల రద్దీ ఎక్కువగా ఉంది. కార్తీక సోమవారం సందర్భంగా స్వామి దర్శనం కోసం భక్తులు పోటెత్తారు.


 సాక్షి, హైదరాబాద్: పోలీసుశాఖలో భద్రత పథకం కింద సిబ్బందికి ఇచ్చే రుణ పరిమితిని, ఎక్స్‌గ్రేషియా సొమ్మును పెంచుతున్నట్లు డీజీపీ అనురాగ్‌శర్మ వెల్లడించారు. గృహనిర్మాణ అడ్వాన్స్ కింద ప్లాట్ కొనుగోలు కోసం సిబ్బందికి రూ.5 లక్షల వరకు పరిమితిని పెంచుతున్నట్లు మంగళవారం ఒక ప్రకటనలో తెలిపారు. అలాగే హెడ్‌కానిస్టేబుల్, పీసీలు, ఏఎస్సై, ఏఆర్ ఎస్సైలకు పరిమితిని రూ.7 లక్షలకు, ఎస్సై క్యాడర్‌లో ఉన్న అధికారులకు రూ.9 లక్షలకు, డీఎస్పీ ఆపై అధికారులకు 11 లక్షలకు పెంచుతున్నట్లు డీజీపీ వివరించారు.
 
 అలాగే నిర్మించిన ఇళ్ల కొనుగోలు కోసం ఇచ్చే సొమ్మునూ భారీగా పెంచారు. వివిధ స్థాయిల్లో ఉన్న అధికారులకు రూ.8 లక్షల నుంచి 23 లక్షలకు పెంచుతున్నట్లు తెలిపారు. సిబ్బంది పిల్లలు ఉన్నత చదువుల కోసం విదేశాలకు వెళ్ళేందుకు ఇస్తున్న లోన్లను 15 లక్షలకు పెంచారు. వ్యక్తిగత రుణాలతో పాటు కుమార్తెల వివాహం కోసం తీసుకునే రుణ సదుపాయాన్ని రూ.4 లక్షలకు పెంచారు. రుణ సౌకర్యం కోసం ఉన్న నిబంధనలను కూడా కాస్త సడలించారు.
 
 గతంలో పదవీ విరమణకు ఐదేళ్ల సర్వీసు ఉంటేనే రుణ సదుపాయం కలిగేది. ప్రస్తుతం దాన్ని మూడేళ్లకే కుదిస్తూ నిర్ణయం తీసుకున్నారు. అదే విధంగా ఎక్స్‌గ్రేషియా విషయంలో సహజ మరణాల కింద ఏఎస్సై క్యాడర్ వరకు రూ.4 లక్షలకు పెంచగా... ప్రమాదంలో చనిపోయిన సిబ్బందికి రూ.8 లక్షలకు పెంచారు. ఎస్సై నుంచి ఆపై స్థాయి అధికారులకిచ్చే పరిహారాన్ని కూడా రెట్టింపు చేశారు. సహజ మరణాలకు రూ. 8 లక్షలు, ప్రమాదంలో చనిపోతే 16 లక్షలకు పెంచారు. భద్రతపథకానికి సిబ్బంది సమ్మతి మేరకు ప్రతినెలా చెల్లిస్తున్న కంట్రిబ్యూషన్‌ను రెట్టింపు చేసినట్లు డీజీపీ తెలిపారు.
  
 ర్యాగింగ్ భూతాన్ని తరిమికొట్టండి
 సాక్షి, హైదరాబాద్: ప్రాణాలను హరించే వికృత క్రీడగా మారిన ర్యాగింగ్ భూతాన్ని తరిమికొట్టాలని డీజీపీ అనురాగ్ శర్మ పిలుపునిచ్చారు. ర్యాగింగ్‌కు వ్యతిరేకంగా ‘సే నో టు ర్యాగింగ్.. ఇట్ మైట్ కాస్ట్ యు’ పేరుతో చేపట్టిన పలు రకాల ప్రచార సామగ్రిని అనురాగ్‌శర్మ మంగళవారం తన ఛాంబర్‌లో ప్రారంభించారు. అనంతరం   మాట్లాడుతూ ర్యాగింగ్‌కు వ్యతిరేకంగా యూనివర్సిటీ, కాలేజీల్లో అవగాహన కల్పించాలని విద్యార్థులను కోరారు. కార్యక్రమానికి బ్యాట్‌మింటన్ క్రీడాకారిణి నైనా జైస్వాల్, బాడీ బిల్డర్ మీర్ మోతిషా వలీ తదితరులు హాజరయ్యారు.


 
      ఎన్నికల బందోబస్తుకు పోలీసుల కసరత్తు
 
      50 కంపెనీల ‘కేంద్ర ’ ఫోర్స్ కావాలంటున్న కొత్వాల్
 
      ఒక్కో బూత్‌కు ఒక్కో కానిస్టేబుల్..
 
      సమస్యాత్మక బూత్‌ల వద్ద ఇద్దరుండాలి: ఎన్నికల సంఘం
 
  సాక్షి, సిటీబ్యూరో: సార్వత్రిక ఎన్నికల బందోబస్తు ఏర్పాట్లలో నగర పోలీసులు తలమునకలై ఉన్నారు. కమిషనర్ అనురాగ్‌శర్మ..  అదనపు పోలీసు కమిషనర్లు, జాయింట్ పోలీసు కమిషనర్లతో బందోబస్తు ప్రణాళికను తయారు చేస్తున్నారు. అన్నీ బాగానే ఉన్నా సిబ్బంది కొరతను అధిగమించడమెలా అన్నది ప్రధాన సమస్యగా మారింది.
 
 ఈ నేపథ్యంలో కమిషనర్ అదనపు బలగాలపైనే ఆశ పెట్టుకున్నారు. నగర పోలీసు కమిషనరేట్ పరిధిలోకి 15 అసెంబ్లీ స్థానాలు, రెండు పార్లమెంట్ స్థానాలు వస్తాయి. సికింద్రాబాద్ పార్లమెంట్ పరిధిలోకి 1484 పోలింగ్‌స్టేషన్‌లు, హైదరాబాద్ పార్లమెంట్ పరిధిలో 1405, మల్కాజ్‌గిరి పార్లమెంట్ స్థానంలోని కంటోన్మెంట్ అసెంబ్లీ స్థానంలో 202 పోలింగ్‌స్టేషన్‌లు ఏర్పాటు చేస్తున్నారు. మొత్తంగా 35,98,152 మంది ఓటర్లు తమ ఓటు హక్కును సజావుగా వినియోగించుకునేందుకు వీలుగా పోలీసులు కసరత్తులు చేస్తున్నారు.
 
 ఒక్కో పోలింగ్ స్టేషన్‌లో మూడు నుంచి ఆరు వరకు బూత్‌లు ఉంటాయి. ఇందులో పురుషులు, మహిళల బూత్‌లు వేరు వేరుగా ఉంటాయి. ఒక్కో బూత్‌కు ఒక్కో కానిస్టేబుల్‌ను, సమస్యాత్మక ప్రాంతాలలో ఇద్దరు కానిస్టేబుళ్లను తప్పనిసరిగా బందోబస్తులో ఉంచాలని ఎన్నికల సంఘం నగర పోలీసు కమిషనర్‌కు సూచించింది.
 
 ఈ రకంగా చూసుకుంటే 3091 పోలింగ్ స్టేషన్లలో బూత్‌ల సంఖ్య పదివేలకు పైగా పెరగవచ్చు. ప్రస్తుతం ఎన్నికల కమిషన్ సూచించిన విధంగా చూస్తే.. కేవలం బూత్‌ల వ ద్దే 15,000 మంది కానిస్టేబుళ్లను ఏర్పాటు చేయాల్సి ఉంటుంది. అయితే నగర పోలీసు విభాగంలో సివిల్, ఆర్మ్‌డ్ రిజర్వులో కానిస్టేబుళ్లు 5015 మందే ఉన్నారు.
 
 కానిస్టేబుల్ స్థానంలో హోంగార్డులను ఉపయోగిస్తే ఆ సంఖ్య ఎనిమిది వేలకు చేరుతుంది. బూత్‌ల వద్ద బందోబస్తుకే పోలీసులు సరిపోరు. ఇక బూత్‌ల బయట ఉండే స్ట్రైకింగ్‌ఫోర్స్, పికెట్లు, మొబైల్ పెట్రోలింగ్, వీడియో సిబ్బంది తదితరాలన్నీ చూసుకుంటే సిబ్బందిని కేటాయించడం కష్టం. కానిస్టేబుల్ నుంచి నగర కమిషనర్ వరకు మొత్తం మన దగ్గర సివిల్, ఆర్మ్‌డ్ రిజర్వు కలిపి మొత్తం 8698 మంది సిబ్బంది మాత్రమే ఉన్నారు.
  
 అదనంగా 50 కంపెనీల కేంద్ర పారామిలటరీ బలగాలు
  
 నగరంలో ఉన్న సిబ్బంది ఎన్నికల బందోబస్తుకే ఏ మాత్రం సరికపోకపోవడంతో కేంద్రం నుంచి మరో 50 కంపెనీల పారామిలటరీ బలగాలను రప్పించేందుకు నగర పోలీసు కమిషనర్ అనురాగ్‌శర్మ కసరత్తు చేస్తున్నారు. ఈ కంపెనీలు వచ్చినా బందోబస్తు పూర్తిగా నెరవేరినట్లు కాదు. ఉన్న సిబ్బందితోనే పకడ్బందీ బందోబస్తు ఏర్పాటు చేసే పనిలో ఉన్నతాధికారులు ఉన్నారు.
  
 కోడ్ ఉల్లంఘనులపై కఠినంగా వ్యవహరించండి : అదనపు కమిషనర్
  
 కోడ్ ఉల్లంఘనపై దృష్టి సారించాలని శాంతి భద్రతల ఏసీపీల సమావేశంలో అదనపు పోలీసు కమిషనర్ అంజనీకుమార్ పేర్కొన్నారు. నియోజక వర్గం రిటర్నింగ్ అధికారితో ఆయా ఏసీపీలు సమన్వయం చేసుకోవాలని, వాల్‌పోస్టర్లు, ఫెక్సీలపై కఠినంగా వ్యవహరించాలని ఆయన సూచించారు. ఇప్పటికే 29 ప్రాంతాలలో నాకాబందీ నిర్వహించి తనిఖీలు ముమ్మరం చేశామన్నారు. మద్యం, అక్రమ ఆయుధాలు, లెసైన్స్ ఆయుధాలు, రౌడీషీటర్లపై ప్రత్యేక దృష్టి పెట్టాలని ఏసీపీలకు సూచించారు.