అక్టోబర్ 2 నాడే..
  అమర్ రహే గాంధీ !
  ‘ముష్టెత్తే జాతిపితలు’
  ఏ ప్రగతికి నాంది ?
  ముక్కుపచ్చలారనోళ్లు...
  ‘సిల్వర్’ గాంధీలా..!
  పేదరికపు పంజరాన..
  చిక్కిన బందీలా !
  పచ్చ నోట్ల మీద చిందు..
  గాంధీ చిరునవ్వు
  బిచ్చమెత్తు బాల్యానికి
  చెవ్వులోన పువ్వు !
  అహింసతో స్వాతంత్రం
  తెచ్చిన ఓ బాపు...
  నీ రూపంతో సాగే
  వ్యాపారాన్నాపు.
 గాంధీ బొమ్మలు పెట్టాం..
  గాంధీ గుడి కట్టాం..
  అడుక్కునే వాణ్ని చేసి
  నడివీధికి నెట్టాం !
  ఈశ్వర, అల్లా అంటే
  నిజమే అనుకున్నాం.
  పైసాయే పరమాత్మని
  ఇపుడు తెలుసుకున్నాం.
 - తనికెళ్ల భరణి