ధవళేశ్వరం:
 రాష్ట్ర ఉత్తమ పీహీచ్‌సీ అవార్డును రాజమహేంద్రవరం రూరల్‌ మండలానికి చెందిన ధవళేశ్వరం పీహెచ్‌సీ గెలుచుకుంది. ప్రపంచ ఆరోగ్య దినోత్సవం సందర్భంగా వెలగపూడి సచివాలయంలో ముఖ్యమంత్రి చంద్రబాబునాయుడు చేతుల మీదుగా పీహెచ్‌సీ వైద్యాధికారి కె.సుధాకర్‌ శుక్రవారం ఈ అవార్డును అందుకున్నారు. ఈ పీహెచ్‌సీకి ప్రతి రోజూ 200వరకు ఓపీ ఉంటుంది. సిబ్బంది రోగులకు మెరుగైన సేవలందించడంతో టీబీ యూనిట్‌ను కూడా ఇక్కడ ఏర్పాటు చేశారు. సిబ్బంది అందరి సమిష్టి కృషితోనే ఈ అవార్డును కైవసం చేసుకోగలిగామని శనివారం వైద్యాధికారి సుధాకర్‌ అన్నారు. ఈ అవార్డుతో తమపై మరింత బాధ్యత పెరిగిందని,   ప్రజలకు మరిన్ని మెరుగైన వైద్య సేవలు అందించేందుకు కృషి చేస్తామన్నారు.